Read on Twitter
واحد من الجيران في العمارة بقاله حوالي ٦ شهور مش بيدفع مصاريف الصيانة، وحصلت مشاكل كتير ما بينه وبين المسؤول عن العمارة.. وكانت الخناقة شغالة على جروب الواتس اب بتاع العمارة.. ومن حوالي شهرين كنت طالع من الشقة وشوفته بيضرب قطة برجليه عشان بتقطع اكياس الزبالة، لومته وقلتله حرام
الراجل ده عنده تقريبا حاجة وخمسين سنة، بينزل على طول بالبدلة والكرافتة وتقريبا بيشتغل في بنك.. مراته مريضة بقالها فترة ومانعرفش عندها ايه بالضبط، بس ما بتنزلش من البيت خالص.. ربنا ما رزقهمش بأطفال.. السكان بيقولوا عليه بخيل لأنه بيلبس جزمة قديمة اللزق بتاعها فاكك من قدام
المهم... من حوالي ٣ شهور كنت بانزل احط اكل لقطط الشارع.. شوية بواقي اكل وعليهم صلصة.. وفي يوم قررت أقف من بعيد اتفرج عليهم وهم بياكلوا، فوجئت بشخص جاي ياخد الطبق وبيهش القطط برجليه.. اتنرفزست وكنت هاروح اهزقه.. وبعدين قلت الصبر طيب.. مشيت وراه
لقيته بيطلع كيس من جيبه وبيحط فيه الاكل.. كان لابس ماسك وترينينج، حط الكيس في جيبه ولقيته طالع العمارة عندنا.. طلعت وراه ولقيته داخل شقة أخينا البخيل... وعرفت طبعا أن ده هو نفس الشخص.. تاني يوم حصلت نفس القصة.. بحكم الجيرة سنين طويلة، لأننا ساكنين في إيجار قديم..
أخته عندي على الفيسبوك، هي متزوجة وعايشة في مكان تاني.. بعتلها رسالة أسأل عليها وسألتها عنه وعن أحواله وقلتلها اني مش بقابله بحكم المشاغل.. المهم قالتلي أنهم مشوه من شغله من حوالي سنتين ومن ساعتها بيدور على شغل! وأنه صرف اللي وراه واللي قدامه على علاج مراته.. كانسر
بعد ما عرفت الكلام ده.. قعدت شوية على الكورسي وجمعت كل المشاهد اللي كلنا كنا فاهمينها غلط.. وبكيت بشدة لما افتكرت شكله وهو بيحط اكل القطط في الكيس وطالع بيته زي الحرامي، بيبص وراه عشان خايف لا حد يشوفه.. بكيت على حاله.. وفهمت انه غالبا بيأكل مراته من اكل القطط
أخته قالتلي انه مش قايل لمراته انه ساب الشغل، وبينزل كل يوم بالبدلة يدور على شغل، وصرف كل مدخراته وباع العربية.. فكرت كتير وقررت اتكلم مع واحد من السكان، خاصة اني عارف حساسية الموضوع، كل السكان كانوا مش طايقينه ومتحفزين ضده.. شرحتله الموضوع وهو كمان بكى زي الطفل قدامي
فكرنا سوا ونادى على مراته وقالت إنها ممكن تلاقيله شغل في شركة واحد معرفة.. عملنا إعلان عن وظيفة مطلوب فيها محاسب خبرة، وحاطيناه على باب العمارة.. تاني يوم كان بيتصل على الرقم اللي في الإعلان وبدأ يشتغل بعدها بكام يوم... الجميل بقى انه في الشهر الأول قبل ما يقبض الراتب
لقيت كل الشقق في الدور بتاعه قدامها أطباق مليانة اكل للقطط... زوجة جاري العزيز قامت بالواجب وكانت بتطبخ وتوزع الأكل قدام كام شقة.. الموقف ده بكل ما فيه، أثر فيا جدا... مفيش حد يقدر يعرف ظروف الناس عاملة ازاي .. كتير من الأشخاص العدوانيين، تلاقي عندهم هموم مستترة
ناس عايشين كويس وفي مستوى معقول، ولما الدنيا بتقلب عليهم بتصعب عليهم نفسهم.. مش بيقدروا يطلبوا مساعدة من حد.. وفي نفس الوقت الشخص ده ماكانش قادر يواجه مراته بالظروف بسبب مرضها.. نرجع ونقول.... الناس لبعضها!
