حاجات ممكن تعملها بفلوس الفرح
---
شوف الـ Thread

- تقريبا اقل حجز للقاعات بالجاتوه و التصوير و الحبشتكنات ٣٠ الف جنيه ، فهنعمل حسابنا على المبلغ ده

١- تطلعوا سوا رحلة تركيا اسبوع كامل انتوا الاتنين بـ ١٤٦٠٠ ، يتبقى معاكوا ١٥٤٠٠ تصرفوا منهم هناك

٢- تطلعوا سوا دبي اسبوع انتوا الاتنين بـ ٢٠ الف جنيه و يتبقى معاكوا ١٠ الاف تصرفوا منهم هناك دبي يعني برج خليفه و المولات

٣- تطلعوا لبنان اسبوع كامل بـ ١٧ الف و يتبقى معاكوا ١٣ الف تصرفوا منها هناك

٤- تطلعوا سوا بالي و ما ادراك ما بالي ، اسبوع تدفعوا ٢٧ الف و يتبقى معاكوا ٣ الاف

٥- ممكن تطلعوا سوا شرم الشيخ و اسعار شرم بتبدأ من ٥٠٠ جنيه للفرد لحد ما انت عايز ، ممكن تحجزوا في فندق نضيف بـ ٢٠٠٠ جنيه الفرد لمدة ٣ ليالي يعني الاسبوع بـ ٨٠٠٠ و يتبقى معاكوا ٢٢ الف

٦- دهب و جمال دهب ، اغلى فندق في دهب ١٣ الف للفردين في اسبوع يعني هتقضوا اسبوع و يبقى معاكوا ١٧ الف ، و لو عايز تعيش شهر في دهب بال ٣٠ الف هتعيش

٧- الجونة و جمال الجونة ، الجونة variety الاسعار فيها عالي ، ممكن تقعدوا اسبوع في فنادق محترمة زي شيراتون او موفينبك او شتيجنبرجر ب ١٥ الف

٨- اسوان و روقانها ، اغلى فندق هناك انتوا الاتنين في اسبوع ب ٢٠ الف و يتبقى ١٠ الاف تجيبوا حمام و تطيروه ، و في فنادق ٥ نجوم زي موفينبك بـ ٨ الاف

٩- لو عايز تسافر المالديف نسفرك ، سعر التذكرة ذهاب و عوده ليكوا الاتنين ١٠٥٠٠ ، و الفنادق الخمس نجوم اسعارها فيها variety كتير ، فندق ب ١٧ الف يتبقى معاكوا ٢٥٠٠

عايزين تروحوا فين تاني

الاسعار كل يوم بتزيد فالحقوا اتجوزوا بسرعه بقا

١٠- ممكن تطلعوا المغرب اسبوع يعني فيلم كازبلانكا و فيلم mission impossible 5 ، الشخصين ب ١٧ الف و ١٠ الاف طيران يبقوا ٢٧ الف و ٣ الاف تأشيرة يبقوا ٣٠ الف

١١- ايطاليا اسبوع : التأشيرة حوالي ٢٠٠٠ جنيه يعني ٤٠٠٠ ، السفر لشخصين ٦٥٠٠ ، الفنادق متراوحة بس فندق ٤ نجوم ١٠٠٠٠ ، و يتبقى معاك ٩٥٠٠ تدلعوا بيهم هناك

١٢- باريس اسبوع ، ٤٠٠٠ تأشيرة ، و ٧٥٠٠ طيران و ١٥٠٠٠ فندق يتبقى معاك ٣٥٠٠

١٣- برشلونة اسبوع ، يعني ميسي و شواطئ برشلونة الجامدة ، تأشيره ٤٠٠٠ و طيران ٧٥٠٠ و فندق ١٠٠٠٠ يتبقى معاك ٩٥٠٠ تروح تتفرج بيهم في الكامب نو على سيد اللاعبين

١٤- سانتوريني اليونان اسبوع ، ٤٠٠٠ تأشيرة و ٧٠٠٠ طيران و الفنادق ال variety زي ما تحب لحد ١٠٠ الف جبتلكوا واحد ب ٥٠٠٠ يبقى معاكوا ١٤٠٠٠ الف تسددوا بيهم ديون اليونان هههه

١٥- كرواتيا اسبوع ، بلد مودريتش ، مش عارف تأشيرتها بكام بس مش هتعدي ٤٠٠٠ ، طيران ٩٠٠٠ و فنادق ١٥٠٠٠ ، يبقى معاك ٢٠٠٠ جنيه

١٦- سويسرا اسبوع ، بس خلي بالك سويسرا غاليه ، تأشيره ٤٠٠٠ و طيران ٧٠٠٠ و فندق ١٠٠٠٠ يتبقى معاك ٩٠٠٠ ، و اقعد انت و مراتك في طبيعه سويسرا الخلابه و شوفلكوا بقرة احلبوها وسط جبال الالب الخلابه

اخواتي البنات اللي عايزين يلبسوا فستان ابيض هتلبسوه والله
١- تلبسوه و تعملوا كتب الكتاب في مكان مفتوح مش هيكلف كتير و فوتوسيشن مع قرة عينك
٢- تلبيسه و تسافريه بيه زي حلا شيحة في عريس من جهة امنيه

اخواتي البنات تاني ، يعني انا عامل الثريد ده عشان فلوس الفرح كتير و الراجل هيتفشخ مصاريف ٣٠ الف ملهمش لازمة ، فتصرفوهم في سفر و تروقوا على نفسكوا ، الاقي بنات تقول ما نعمل فرح و نسافر على اساس ان الشباب مليونيرات و كدا

اكتر عرض مغري
---
٤ ايام في شرم ٤٠٠٠ + ٤ ايام في دهب ٤٠٠٠ + ٤ ايام في الجونة ٦٠٠٠ + ٤ اسوان ٦٠٠٠ + ٤ ايام اسكندريه ٤٠٠٠ + ٤ ايام مطروح ٤٠٠٠ + يومين في القاهرة ٢٠٠٠
----
٢٦ يوم عسل = ٣٠ الف

- الثريد ده الاماكن المتاحة حالياً ، في اوبشن جميل انكوا تسافروا عمرة لما السعودية تفتحها عشان مقفوله بسبب كورونا ممكن تكون اغلى شوية من ٣٠ الف

شباب الاسعار دي بتاريخ اليوم ، اي زياده انا مش مسؤول ياريت تتجوزوا النهاردة لو تعرفوا

انا بس عايز اقولكوا حاجة مهمة ان اسعار السفر مش المشكلة ، المشكلة في المصاريف هناك خصوصا اوروبا هناك هتتعامل باليورو يعني عشان تقعدوا في مطعم هتدفعوا مثلا ٣٠ يورو يعني ٦٠٠ جنيه

نصيحة لاخواتي البنات : قبل كتب الكتاب خليه يوريكي حجز الفندق و التذاكر و تروحي تطلعي التأشيره معاه ميضحكش عليكي و يقولك بعد الجواز ، انا مليش دعوه

يا بنات والله هتلبسوا فساتين بس بدل القاعه و طنط فلانه اللي هتقعد تطلع القطط الفطسانة في فستانك و ميك ابك ، هتعملوا كتب كتاب في مكان مفتوح و البسي الابيض عادي و الله

انا زهقت من اخواتي البنات

الغاء الفرح و السفر مكانه معتمد على ان بنت خالة العروسة تسافر هي الاول ، اختار اللي بنت خالتها تسافر و تلغي الفرح

عندي سؤال عايز افهمه لاخواتي البنات
—
ايه الفرق بين الفرح و بين كتب الكتاب في مكان مفتوح و تعزمي صحابك و تلبسي فستانك ؟ يعني المشكلة في الرقص ؟ و الاغاني ؟

ممكن نعمل حل تاني
—
لو العريس و العروسة عايزين يسافروا ، العريس يدفع فلوس السفر
- لو العريس عايز يسافر و العروسه عايزه فرح ، العريس يدفع ٣٠ الف سفر و العروسه تدفع فلوس الفرح ، مش انتوا عايزين مساواه ؟

اخواتي البنات اللي بيقولوا نعمل فرح و السفر في اي وقت فاحب اقولهم ههههههههههههههه ، كل الكابلز اللي اتجوزوا كانوا بيقولوا كدا و اخر اسكندريه عشان بعد الجواز المسؤوليات بتزيد و السفر هيكون مجرد رفاهيه ملهاش لازمة