Read on Twitter
رجعت من الشغل بعد اسبوع شاق، اول ما دخلت البيت فكرت تشرب قهوة، لقيت مكنة القهوة اشتغلت وعملتلك قهوة. فكرت تسمع ام كلثوم لقيت التليفزيون شغل يوتيوب وشغلك الف ليلة وليلة.. فكرت تبعت رسالة لصاحبك.. بعتّهاله بدماغك ورد عليك بدماغه ووصلك الرد. اهلا بيك في عالم الـ Neuralink
عشان نفهم الـBrain Computer Interface لازم نفهم الأول شوية عن المخ.الانسان مخه ممكن نعتبره نظام بيولوجي كيميائي معقد. في نفس الوقت، مخك في الواقع جهاز كهربائي بيشتغل بحوالي 20 وات. تخيل 20 وات بس زي اللمبة السهاري بس معجزة بيعمل عمليات محتاجينلها آلاف الوات عشان تتعمل بالكمبيوتر.
وبما أن المخ بينطبق عليه أنه نظام System من المدخلات والمخرجات يبقا ده معناه أنك ممكن تفهم بيشتغل ازاي من دراسة تأثير المدخلات على المخرجات. من دراسة المخ عرفنا أنه شبكة معقدة بتمر فيها الاشارات الكهربائية من مكان لآخر من خلال الخلايا العصبية Neurons والوصلات العصبية Synapses.
النظر للمخ كهربائيا خلانا نقدر نتابع تأثير المدخلات على تنشيط أماكن معينة في المخ فيها اشارات عصبية Neurotransmitters كبيرة طب ازاي الكلام ده عملناه؟ جبنا حاجة شبه الفولتميتر عشان نشوف اللمبة شغالة ده ولبسناها لإنسان في مناطق مختلفة من المخ وشفنا رسم بياني للنشاط الكهربائي
اتطور الأمر مع جهاز الـ EEG واللي بالتجربة وتحليل القرايات بتاعته عرفنا نكون فكرة بسيطة عن مناطق الاحساس والحركة والرؤية وغيره. لحد ما ظهرت فكرة اننا نوصل جهاز الـ EEG بالكمبيوتر ونخليه الكمبيوتر نفسه يعمل حاجة لما تجيله اشاره معينه. التطور ده بقاله فترة يعني من السبعينات
في تطور موازي لل BCI كان تطور الـ UX أو تفاعل المستخدم مع الكمبيوتر أو الموبايل لحد ما من كام سنة الذكاء الاصطناعي اتطور لأنه بيفهم (نوعا ما) مخرجات مخ البني آدم من رؤية وصوت ولمس وأصبح يستطيع أنه يتوقع تفكير البني آدم من خلال متابعة أنماط الانسان في التفاعل مع الاشياء من حوله
فكرة Neuralink هي أنك بتوصل المخ بشكل مباشر مع الـ AI، المخ بينتج اشارات لما بتفكر في حاجة (زي انك تحرك إيدك مثلا)، الجهاز بيحول الاشارات لكود بيفهمه الـ AI من خلال انه متدرب ومعاك ايضا وبعدين بيصدر اشارات لمخك ان الأمر بيتنفذ واشارات أخرى للمنفذ الالكتروني انه ينفذ اللي فكرت فيه
هنا مثلا باستخدام شريحة Neuralink مزروع جوه مخ القرد ده استطاع أنه يدرب لعبة Ping Pong ويلعبها بمخه بدلا من الـJoystick اللي كنا بنلعب بيه واحنا صغيرين نفس اللعبة. تطور قد يبدو مرعب للبعض ولكن نجاحه مرتبط بقدرة الAI على فهم الاشارات من المخ وده شيء مش سهل في كل السيناريوهات.
واخيرا في 2020 و21 شفنا قرد بيلعب Ping Pong بمخه وشفنا Vaccine عبارة عن كود مبرمج لخلايا الانسان انها تنتج البروتين شبيه باللي على سطح الفيروس فيؤدي لأن الجسم ينتج المناعة اللازمة لمحاربته.. احنا داخلين على تطور هائل في العلاقة ما بين الانسان ونفسه أولا قبل علاقته باللي حواليه :)
