بعد إتمامي لعامي الـ٢٣، حاب أحكي أكمن شغلة:
١- الحياة ما بعد الدراسة صعبة جدًا وبتختلف كثير عن حياة الجامعة.
٢- الصاحب اللي بضل معك بعد ما تتخرج عالأغلب رح يضل صاحبك طول حياتك.
٣- الوظيفة المناسبة هي الوظيفة اللي بتأمنلك مستوى مادي آمن.

٤- لازم توكل هوا من السبت للخميس مشان توكل مشاوي الجمعة.
٥- طلاب الطب (على وجه الخصوص) أصحاب مواقف ورجال، بدون شرح.
٦- افصل حياتك العملية عن حياتك الشخصية.
٧- لا تقول انك بتعرف وانت ما بتعرف.
٨- استخدم "شكرًا" و "تفضل" و "يعطيك العافية".
٩- حياتك العاطفية الك مش للناس.

١٠- مش كل اشي بنحكى للعامة.
١١- اسمع كل أنواع الموسيقى من الهجيني لفرانك سيناترا.
١٢- لا تسوق بدون حزام الأمان.
١٣- اوعك تمر قدامك بنت وتسمّعها حكي.
١٤- الغش بالامتحانات والعلامات العالية دوبامين مؤقت يتلاشى عند أول سؤال في مقابلة العمل.

١٥- لا تطلع من بيتك وأمك زعلانة منك.
١٦- احترم حدود الناس اللي بحياتك (حتى الأقربون)
١٧- الغماز اللي بسيارتك حطوه فيها لسبب.
١٨- أسعد من تحب ولا تنتظر مقابل.

١٩- الدخان آفة، اذا ما بتدخن لا تقرب منه.
٢٠- اصدق مع الناس.
٢١- لا تستخدم تلفونك وانت مع الناس إلا للضرورة القصوى.
٢٢- توكل على ربنا ولا تضل تفكر باللي جاي.
٢٣- الحمدلله على نعمه في كل لحظة.