Suna hai log usay aankh bhar ke dekhtay hain
So us ke shehar main kuch din tehar ke dekhte hain

Suna hai rabat hai us ko kharab haalon se
So apne aap ko barbaad kar ke dekhte hain

Suna hai dard ki gahak hai chashm e naaz us ki
So hum bhi uss ki gali se guzar ke dekhte hain

Suna hai us ko bhi hai sher o shairi se shaghaf
So hum bhi moujzay apne hunar ke dekhte hain

Suna Hai bole to baaton se phool jharte hain
Yeh baat hai to chalo baat kar ke dekhte hain

Suna hai raat usay chaand takta rehta hai
Sitaray baam e falak se utar k dekhte hain

Suna hai din ko usay titliyan satatee hain
Suna hai raat ko jugnu tehar ke dekhte hain

Suna hai Hashar hain us ki ghazal si aankhain
Suna hai us ko haran dasht bhar ke dekhte hain

Suna hai raat se barh kar hain kaakilain us ki
Suna hai shaam ko saaye guzar ke dekhte hain

Suna hai us ke labon se gulaab jaltay hain
So hum bahaar per ilzaam dhar ke dekhte hain

Suna hai aaina e tamsaal hai jabeen us ki
Jo saada dil hai usay bun sanwar ke dekhte hain

Bus ek nigaah se lutta hai qafila dil ka
So rah rawan e tamanna bhi dar ke dekhte hain

Suna hai us ke shabistaan se muttasil hai bahisht
Maseeh udhar ke bhi jalway idhar ke dekhte hain

Rukay to gardishain bhi us ka tawaf karti hain
Chalay to usko zamanay tehar ke dekhte hain

Kahaniyaan hi sahi, sub mubalghay hi sahi
Agar wo khwaab hai to taabir kar ke dekhte hain

Ab us ke shehar main tehrain ke kooch kar Jayain
Faraz, Aao Sitaare Safar Ke Dekhte Hain