صرلي كم يوم عم شوف على وسائل الإعلام كيف عم يحكوا عن هجرة الأطباء. بيطلعلك كم فيلسوف وبيبلشوا تنظير إنه لأ الأطباء لازم يبقوا والخ الخ من أكل الهواء. بس ما حظا طلع وعطانا البديل...
أول شي، أغلبية أطباء لبنان بيتخرجوا عندهن دين عالبنوك لأن قسطهن بالجامعات الخاصة شي خيالي...

ثاني شي، بده الحكيم عالقليلة ٦ أشهر ليقدر يفتح عيادة بعد ما يتخرج من ورا قرف الوزارات والنقابة...
ثالث شي، لنفترض فتح عيادة، بده الحكيم عالقليلة ٥ سنين شغل ليبلش ينسمع بإسمه ولوقتها بيكون بعده محتاج لأهله ليعيش...وما تنسوا إنه الطبيب بيتخرج عمره عالقليلة ٣٠ سنة...

رابعا، الطبيب الجديد بالمستشفى راسه دايما مأكول من الأطباء يللي صرلن أكثر منه وكلنا منعرف إنه المستشفيات بلبنان هيي عبارة عن مافيات...
خامسا، كل شي بيحكمه الطبيب على حساب وزارة الصحة والضمان بيقبضهن بعد شي ٣ ٤ ٥ سنين، هيدا إذا قبضهن...وهلق عاللبناني يعني شو بدي خبركن...

سادسا، الطبيب بلبنان هو عبارة عن عبد لمرضاه، اتصالات صبح وضهر وعشية ونص ليل...ولأ ما تقولولي إنه هو عارف هيك أو إنه عادي...جربوا دقوا لحكيم بأميركا أو فرنسا أو أستراليا...ما فيكن لأن أصلن ما بيعطوكن رقمهن...يعني حتى حياة اجتماعية وعائلية ما في...

وهلق بيجي يللي بده يتفلسف ويقول ما الطب رسالة...صح هو رسالة...بس بكل بلاد العالم...لأنه الطب رسالة، الدولة والعالم بتحترم الأطباء وبتكافيهن بحياة كريمة...
ما في غير عنا...بدن يكون الطب رسالة...بس بدن يدعسوا على كل حقوق الطبيب وبدنا نبقى ساكتين...إيه فشرتوا!!!!