بما ان الجهل واصل للركب، ثريد عن قضية فلسطين منذ نشأتها لليوم كما هي وبدون اي دوران وياريت تقروه عشان ما تضلكو مبهدلين حالكو بالجهل وتتثقفو شوي عشان عيب.

اول اشي بأواخر القرن ال١٩ نشأت الحركة الصهيونية بأوروبا وبتدعي لإنشاء وطن لليهود يا بالارجنتين يا بأوغندا يا بفلسطين، بسبب -

التمييز والعنصرية واللاسامية بأوروبا ضد اليهود. بعد مؤتمر بسويسرا حضره ٢٠٠ شخص بقيادة ثيودور هرتسل وقع الاختيار عفلسطين عشان يفدرو يجيشوا اليهود بحجج الدين والتوراة وارض الموعد. بلشو يشتغلو عالاشي بمساعدة اخر سلاطين الدولة العثمانية كيف؟ كانو الفلاحين بالقرى الفلسطينية-

يعانو من ضرائب عثمانية عالية وبسببها يحطو اراضيهن بأسامي اقطاعيين متل عائلات من سوريا ولبنان (سرسق تيان سلام جزائري الخ) بعد مدة باعت بعض هالعائلات بعض الاراضي للوكالة اليهودية وبلشت تظهر اول المستوطنات بأواخر ال١٨٨٠ تحت انظار العثمانيين لحد ما خلص حكمهم وصار في حوالي ٤٠ مستوطنة

وصلنا للانكليز الي عملو وعد بلفور سنة ١٩١٧ بيعطي ارض فلسطين للصهاينة. وبلش الانتداب البريطاني عفلسطين وبلش يجيب يهود اشكناز من اوروبا بحجة اسكانن وهروبهن من الهولوكوست... اسا بس حسو الفلسطينية في اشي غلط عملو ثورة ١٩٣٦ الي كانت عبارة عن استهداف المراكز البريطانية والصهيونية

واضرابات وعمليات بسلاح جدا متواضع ورغم هيك هالثورة اوشكت انها تنهي المشروع الصهيوني والانكليزي بفلسطين بما انه الثورة استمرت لل١٩٣٩، بالاخر قمعتها بريطانيا بالاتفاق مع حلفاء بالمنطقة و"قادة" معينين وكانت اول مرة ببين فيها التدخل بالقضية من قِبل بعض الحكام ضد الشعب الفلسطيني.

اسا بعد ما قمعو الثورة وصلنا لسنة ١٩٤٧، كانو الصهاينة بملكو حوالي ٦٪ من الارض كلها لأسباب الي ذكرتها فوق وبشكلو اكتر من ربع السكان بشوي. اصدرت الامم المتحدة قرار تقسم فلسطين عام ١٩٤٧ بإعطاء اليهود ٥٨٪ من الارض والفلسطينيين ٤٢٪. نصّبت الدول العربية نفسها متكلم عننا ورفضو التقسيم

واعلنو الحرب عالعصابات الصهيونية. وعملو جيش الانقاذ العربي الي بس يسمعو جدودنا اسمه بسبو الساعة عشان كان اله سبب كبير بالتهجير. دخلو من هون ودارت بعض المعارك من هون. الناس بتحكي كانو ينسحبو بدون سبب فجأة تيجيهن اوامر انسحاب ويفوت الصهيوني يحتل ويطرد الناس. حتى بعض العرب قالو -

للناس اطلعو اسبوعين منكون حاربنا وبترجعو. طبعا كلو بالاتفاق. عبدالقادر الحسيني قائد المقاومة الفلسطينية صعق من الي صار ومن اوامر الانسحاب العربي لصالح الصهيونية وتركه وحيدا رغم تقدمه. حتى انو ما ردو عليه بطلبات منه. بعت لجماعة الدول العربية "تركتوني بدون سلاح في اوج انتصاري"

وهون اجا دور العصابات الصهيونية الي كانت مسلحة ومدربة متل الهاچانا والارچون (الي صارو اسا جيش اسرائيل) بلشو يحاصرو قرى ومدن فلسطينية ويقصفوها. كانو مثلا يسكرو ال٣ جهات ويبلشو قصف وبتركو جهة وحدة مفتوحة يا عالحدود يا عالبحر حتى الناس تترك وتروح. او يدخلو يعملو مجازر.

صار في حوالي ٧٠ مجزرة سنة ١٩٤٨ اشهرها دير ياسين، الدوايمة، الطنطورة، عيلبون الصفصاف وغيرها.. الالاف ماتو. وتم تدمير حوالي ٥٠٠ قرية ومدينة وتجمع سكني فلسطيني وتهجير سكانهم حوالي ٧٥٠ الف انسان عالضفة غزة الاردن لبنان سوريا ومصر..

اعلنو استقلال الدولة بعد كل ما افرغو اغلب سكانها. اسا بعد نشأة الدولة مفش كتير سكان فيها ليش؟ لإنو الدعاية الصهيونية ما جذبت اليهود الشرقيين وهون بدا موضوع تاني. بلشت الوكالة الوطنية تتعامل مع بعض الانظمة العربية حتى يههجو اليهود ببلادهن او ينقلوهن بسرية عفلسطين،

متل عميلة بساط الريح ونقل يهود اليمن لهون، يهود العراق سوريا ليبيا المغرب مصر الخ. واجو لهون مع انو في كتير يهود شرقيين اول ما اجو لهون صارو يبكو قالو تركنا العز ببلادنا واجينا عتالين لهون (كان في تمييز ضدهن) هاي هي ارض الميعاد؟؟
بعدين اجينا يا حبايبي لنكسة سنة ١٩٦٧ الي مش

قادرة استوعب البلوة الجديدة الي دخلونا فيها وادت لتهجير جديد النا (نسيت اذكر انو الاردن حكمت الضفة والقدس الشرقية، ومصر حكمت غزة) ف خسروهن وبلش احتلال الجزء التاني من فلسطين.
نشأت السلطة الفلسطينية سنة بالتعسينات وعملو اتفاق اوسلو مع اسرائيل. شو بنص هدا الاتفاص بملخص عام؟

عالاتفاق بنص على انو يصير في حل الدولتين، دولة فلسطين على ٢٢٪ من الارض (القدس الشرقية، الضفة وغزة) والباقي لاسرائيل. وافق جميع الاطراف عادي.
بعد مدة اسرائيل ما التزمت. اخدت القدس الشرقية، كل يومين بتبني مستوطنة بالضفة عاراضي الناس، بنو مستوطنات بغزة لحد ما حماس شالتهن بل٢٠٠٧

اليوم في حوالي ٦٠٠ الف مستوطن غير شرعي بالضفة الغربية وحوالي ٢٠٠ مستوطنة على اراضي الفلسطينية واملاكهن الخاصة. الضفة عبارة عن جزر وصعب الحركة فيها بدون مضايقات وحواجز. مابعرفش ليش دايما بفكرو احنا الي مابدنا حلول واسراىيل حمامة السلام.

غزة كان فيها مطار دمرته اسرائيل كليا، اليوم ابن غزة عايش بحصار بري وجوي وبحري ببقعة صغيرة جدا و٦٥٪ منهم لاجئين ونصهن بمخيمات لا تصلح للعيش. قطع كهربا حوالي ٢٠ ساعة بالنهار معدلات بطالة عالية وقصف كل يومين ومفش محل تتخبى فيه. من دون ما ننسى طبعا سرقة القيادات بكل موضوعية.

واذا بدو يسافر بدو يستنى معبر رفح حتى يفتح مرة كل الف شهر ويقعد ينطر يومين يجي دوره تحت الشمس قاعد حتى يسافر من مصر غير البهدلة يلي بتعرضلها ليوصل عالقاهرة كتير ناس انخطقت او انسرقت بسينا.
اسا الضفة كمان اذا بدك تسافر بدك تمرق عجسر الاردن تتشيك من ٣ حواحز اسرائيلي اردني فلسطيني

وتقعد تتسنى ٦ ساعات عالجسر حتى تقدر تعبر الحدود وتروح عمطار عمان. ليش؟ عشان ال٢ مطارات تبعنا مدمرين او مسروقين من اسرائيل.
وطبعا اذا انا من بيت لحم بدي ازور القدس الي هي بعيدة عني ٧ دقايق بدي تصريح وصعب اخده، ورحلة ساعتين. تخيل اذا عيلة مقسومة بالمنطقتين؟

مش رح انسى اللاجئين البرا الي ممنوع يزورو البلد ولا دقيقة واسرائيل رافضة تطبق قرار الامم المتخذة رقم ١٩٤. حتى اذا انت فلسطيني من نابلس رام الله بيت لحم الخ معك باسبورت اميركي فرنسي هندي ممنوع تفوت من المطار بدك تيجي عن طريق الاردن وتمرق عالجسر تتمرمرط.

بعد في كتير حكايا بتخص اعاقة التعليم والطبابة والخ نفس العرقلات الي فوق بس مش اطول بالحكي كتير.
بإختصار هاي هي قضية فلسطين الي كل ما طق الكوز بالجزة ليست قضيتي عأساس بتعرف اشي عنها او قاعد ورا كيس الرمل بتحارب. حقك تقول بلدك اولا وصدقني مش مطلوب منك تحارب ولا انا بقبلها اصلا

بس مش مسموح ل ولا مخلوق يجي يحكي عن جهل او يفتي ب اشي بعرفش فيه ويقلل من معاناتنا ويتمصخر وهو يمكن اذا بعيشهن يومين بينتحر. احنا علينا واجب نوعي الناس ونحكيلها واقعنا والي منعيشه والحقيقة عشان اغلب الناس بتحكي عن جهل بدون قصد بسبب قلة الوعي. ما بفكر في انسان حقود او دنيء هالقد

يتمصخر عغيره. القضية هي الناس المظلومة والي بتعاني لا قيادات ولا سلطة لافلسطينية ولا تجارة وسرقات عحسابنا وعحساب اللاجئين والفلسطينية بعد ٧٢ سنة من سرقة احلامهم ومستقبلهم. وبس

اه صح والي ساهمو بنكبتنا اسا بلومونا وبعملو اتفاقيات عحسابنا وبزايدو علينا بحملونا جميلة!!
ارحمونا