Read on Twitterفيه تجربة شهيرة ل٥ قرود محطوطين في قفص ومعاهم موزة، اول ما يقربوا من الموزة كان بيترش عليهم مية سخنة جدًا، يحاولوا يقربوا من الموزة تاني تترش المية تاني، لغاية ما ترسخ في ذهن القرود ان الاقتراب من الموزة بيتبعه عقاب مؤلم فتوقفوا تمامًا عن الاقتراب
بعد شوية سحبوا قرد منهم ودخلوا قرد جديد محضرش واقعة المية السخنة، فتقدم القرد بثقة تجاه الموزة، بدأت كل القرود تصرخ في محاولة لمنعه من الاقتراب لانهم حضروا الواقعة وعارفين ان فيه عقاب بالمية السخنة، القرد الجديد يحاول يقرب، القرود تصرخ، لغاية ما توقف تماما عن الاقتراب
خرجوا قرد تاني من القدام ودخلوا قرد جديد للقفص، حب يقرب من الموزة فبدأت القرود كلها بما فيها القرد اللي دخل قبله يصرخوا، القرد اللي دخل قبله بيصرخ اعتراضًا رغم انه محضرش واقعة المية السخنة، لكنه شارك في شئ هو لا فاهمه ولا يعرف له سبب
استمرت التجربة باخراج قرد قديم وادخال قرد جديد لغاية ما القفص بقى كله قرود جدد ولا واحد منهم حضر واقعة العقاب بالمية السخنة، لكن كلهم خايفين يقربوا من الموزة، خايفين من حاجة بدون سبب يعرفوه، خايفين لانهم شافوا اللي قبلهم خافوا فقلدوهم في الخوف من الفكرة الجديدة بدون تفكير
فكر بينك وبين نفسك في عدد الحاجات اللي خايف تعملها لان كل اللي قبلك وحواليك خافوا منها وخوفوك رغم ان هما نفسهم ميعرفوش سبب لخوفهم غير انه شعور سائد اتنقل لهم من اللي حواليهم، واللي حواليهم كان منقول لهم نفس الخوف من اللي حواليهم، تدور على سبب الخوف او مصدره متلاقيش
جرب بنفسك، خد الريسك، عمرك ما هتعرف حقيقة شئ طالما مجربتوش بنفسك، كل الحكاوي اللي بتتحكيلك هي حكايات ناس بينقلوا انطباعاتهم الشخصية بناء على تجربتهم الشخصية الخاضعة لصفاتهم وامكانياتهم الشخصية، انت شخص تاني بظروف وصفات وامكانيات مختلفة بالتالي تجربتك انت هي الفيصل مش تجربتهم
