Read on Twitter
الاكتئاب كيماويات في جسمك يمكن تعديلها بطرق كتير افتكر ده كل ما دماغك تسوحك ان الواقع او حياتك هي اللي فيها حاجات غلط وتصورها انها اكبر من حجمها الحقيقي. سي - دو ...سيروتونين دوبامين ..مخك تديله سيدو تبقي سيده
واوسخ حاجة في ان في معضلة بتخليك اصلاً مش عايز تقوم تظبط الكيماويات دي لانها بتقنعك انه طب هتظبطها ليه مش فارقة وتخليك معندكش طاقة تحسن الوضع ...ثعباني جداً.
فا انا شخصياً بجرجر نفسي ...قوم اقعد في الشمس العب مع قطة اقعد تحت شجرة خد دوبامين مجاناً من مزيكا حلوة ..اقعد اكتب انت بتحب تكتب ..كلم حد عاقل ..ركز مع نفسك ..تأمل لجوة ..تأمل لجوة ..تأمل لجوة ..او في ايام بتبقي جحيم بتبقي كلها بلايستيشن وفقدان وعي.
الدوبامين بييجي من المتعة والانجاز ..فا تلاقي نفسك بتحاسب نفسك انك معملتش حاجة في حياتك وزهقان وكفران طول الوقت لانه قليل ..انا شخصياً بواجه ده بانجازات بسيطة زي ما بتحاول تولع بولاعة في البوتاجاز ..ولعة بسيطة كدة تزق معايا بشوف اكتيفيتي بسيطة بانجزها عشان اخد دوبامين الانجاز
الدوبامين برضه بييجي من الاكل والجنس والمتعة والمتعة بتيجي من انك تعيش في اللحظة ..بحاول اركز في التأمل احياناً في حاجات بحب اكلها او اشربها وبفكر في ميولي الجنسية شوية وايه بيثيرني ..زي ما بتجرب فيوزات العربية عشان تشوف المشكلة فين ..شعلل حواسك بطريقة تأملية.
الاكتئاب بيشتغلنا اننا نروح لاكستريم اثارة احياناً عشان نجرب نشغل الاحاسيس اللي واقفة دي فتلاقي نفسك طالب بيتزاية لارج وتحاول تحس بكل حاجة فيها وتدفن نفسك فيها عشان تحس بيها وغالباً ده مبيحلش حاجة وبتجوع تاني.
لكن الحقيقة نظام متوازن باكلات صحية علي قلة استثارتها يعني مفيدة اكتر لمخك في اللحظة دي اي حاجة طبيعية مش مصنعة وفيها الياف تساعد جهازك العصبي احسن بكتير. وقلل لحمة وفراخ واي حاجة حيوانية.
هي حرب مكونة من العديد من المعارك اللي بتتمرن فيها تكسب مش مطلوب تكسبها كلها مطلوب بس يبقي عندك القدرة علي الخناق ومع الوقت هتكسب كل المعارك وهتتحكم في دماغك فا سامح نفسك علي اي معركة تخسرها لان لسه معارك كتير وتمام المهم بس تبقي مدرك ان الموضوع في دماغك مش في العالم.
خصص وقت لنفسك واقفل النت لأنه لا وعي مكتئب جمعي ومخك في الـlow serotonin بيلاحظ الحاجات الكئيبة اللي بتخليك تفقد الامل مع انك مبتروحش قاصد تتسحل في اخبار كويسة او نقاشات مفيدة او فيديوهات تعليمية او حاجة مسلية .مسحول لا نهائياً في تايملاين كئيب لان دماغك ده منطقي مع حالتها دلوقتي
لو المشكلة حجمها ٢ دماغك مخلياها ٥ ولو حد اتعامل معاها غلط هتحس انها ٦ ولو سبتها وركنتها هتفضل تتطور ..زي اي جرح عضوي عادي لو شفت نقطة دم بسيطة بيجيلك بارانويا تكبر الموضوع. مش قاصد ان مشاكلك في الواقع قليلة لكن نسبياً مع تصورك ليها في الاكتئاب غالباً محلولة انت بس محتاج تروقلها
المخدرات مبتعالجش الاكتئاب المخدرات بتسكن الاكتئاب زي واحد عنده الزايدة خد بنج ...اقعد اديله بنج للابد ..انت كدة معملتش العملية انت كدة خدرت المريض..المخ المكتئب ممكن يشوف ده حل احياناً لانه بيرتاح ولو لليلة لكن ده مش حل ده مسكن.
علي صعوبة التقييم المنطقي لكن امسك ورقة وقلم واكتب اللي في ايدك واللي برة ايدك من افكارك اللي بتهاجمك ..في وباء ..مش بايدك ..خايف علي مستقبلك ..مش في ايدك ..حاسس انك معفن ..في ايدك قوم استحمي ..كدة ..بعد ما تخلص الexercise ده بطل تعاقب نفسك علي خانة مش في ايدك.
وادي نفسك وقت في ايام كل ده مش هيبقي valid واللي بيكلمكوا ده نفسه بيفشل مطلقاً في كل الحاجات بسيب نفسي مطلقاً بفتكر بس :
- متاخدش اي قرارات النهاردة.
- متعملش اي مجهود في حاجة.
- وقتك لنفسك اتبسط مطلقاً.
- ان النهاردة اجازة مش حاجة تحسسك بالذنب.
- متاخدش اي قرارات النهاردة.
- متعملش اي مجهود في حاجة.
- وقتك لنفسك اتبسط مطلقاً.
- ان النهاردة اجازة مش حاجة تحسسك بالذنب.
اتمني الرغي ده يساعد حد يساعد نفسه.
