Read on Twitter
بما ان اليومين اللي فاتوا دول في هري كتير اتقال في موضوع الدكاترة و الكورونا فانا حبيت احكي تجربتي كدكتور اولا و مصاب سابق بالكورونا ثانيا في ال tweets الجايين.
المنطقة اللي شغال فيها هنا في المانيا ظهر فيها حالات كورونا كتير و ايامها رجع ناس كتير من سويسرا و ايطاليا اللي كان ايامها Risk zones فسلسلة المستشفيات في تعاون مع المدينة قرروا يعملوا Test center في المستشفي عندنا و كانت المشكلة انهم هيحتاجوا عدد ضخم من الاطباء يغطوا النباطشيات
فقرروا انهم يستعينوا بدكاترة العيادات بره و الhouse doctors و دكاترة من مستشفيات تانية و احنا من المستشفي عندنا، طبعا بما ان دكاترة الباطنة مش كفاية كانت كل الاقسام بتشارك و ده اللي خلي واخد زيي جراحة عظام مثلا يعمل مسحات كورونا و الدنيا كانت منظمة
لما الحالات كترت اكتر و لاحظوا من بدري ان الدنيا هتفتح، و ان مش كل الحالات هتحتاج تروح العناية لو حالتها وحشة او تتغزل في البيت لو مفيش اعراض، و ان في حالات مينفعش يفضلوا في البيت بش حالتهم مش متقدمة انهم يطلعوا العناية. فتحوا قسم او عنبر جديد في المستشفي للحالات دي
العنبر ده كان شايله بتوع الباطنة بشكل اساسي و الاقسام التانية كلها بتساعد بحيث ممكن في النباطشية يبقي في باطنة علي نسا علي عظام مثلا و كان مقسوم نصين، نص للحالات المؤكدة كلهم معزولين مع بعض و نص المشكوك فيه و مستنيين النتيجة و كل واحد منهم معزول في غرفة لواحده
في الوقت ده كان دكتور باطنة معانا بيحاول يدربنا علي الBasics اللي ممكن نحتاجها كجراحين عشان نتعامل مع المرضي. زي الMonitor و ازاي تتعامل معاها و تاخد بالك من ايه و ايه الPlan في كل موقف معين مثلا. المهم يومها كنت انا و هو و دكتور و دكتورة تانيين من القسم عندنا
دكتور الباطنة ده تعب بعدها بيومين و درجة حرارته بقت 39. علطول اتعلمه swab و اتعزل في البيت. لما طلع بعدها positive شافوا مين كل اللي كان شغال او ليه contact معاه لاكتر من ١٥ دقيقة مسافة اقل من متر و نص (زيي انا و زمايلي) و عملوا لستة و قالوا اللي يظهر عليه اي اعراض لازم يتفحص.
الكلام ده كان اول ٤ و انا كان ساعات بيجيلي حساسية خفيفة في الفترة دي كل سنة و اكح كحة خفيفة و مكنتش مدي الموضوع اهمية لأني مكانش عندي اي اعراض تانية. المهم الدكتور بتاع العاملين في المستشفي كلمنا و قالنا ان حتي لو الاعراض خفيفة او تبان عادية لازم بتعملنا Test و رحنا كلنا اتفحصنا
انا يومها روحت عادي ومش في دماغي عشان مفيش symptoms اوي. تاني يوم نازل رايح الشغل، تحت البيت التليفون رن، كان الدكتور بتاع العاملين في المستشفي و قالي انت طلعت positive و من اللحظة دي ترجع تقعد في البيت و تدخل عزل مبدأي لمدة ١٤ يوم و انه هيبلغ مكتب الصحة و السلطات في المدينة عندي
هنا النقطة المهمة في الموضوع بقي، مكتب الصحة في المدينة عندي (ساكن في مزنة غير اللي فيها المستشفي) كلمني و قالي هنبعتلك Mail و Post فيه تعمل ايه و متعملش ايه و لو معاك ناس في البيت تتعامل معاهم ازاي و ان ناس من البوليس ممكن تعدي عليا في البيت تتأكد اني في البيت ملتزم بالعزل
مكتب الصحة برضه قالولي انهم هيتابعوا معايا بالتليفون تطور الحالة و الاعراض اللي عندي. في الوقت ده كلمت الhouse doctor بتاعي عشان اعرفه الحالة و اخليه يكتبلي علي مرضي مبدأيا لل ١٤ يوم عزل و بما اني معزول ادوني معاد Online و الدكتور كلمني Video call و قالي هنبعتلك التصريح علي البيت
طبعا لما طلعت انا و الاتنين الدكاترة اللي معايا Positive عملوا swabs للقسم كله عندنا سواء دكاترة او تمريض. طلع رئيس القسم و دكتورة تانية برضه positive و اعتزلوا في البيت. كده تقريبا نص القسم معزول. طبعا كل ده مكتوبين مرضي (مش محسوب من اجازتنا) و المرتبات شغالة عادي
طبعا في الوقت ده مكتب الصحة كان بيكلمني كل يوم بصبح بيسألوا هل انا لوحدي في البيت و لا معايا حد؟ هل الاعراض احسن/ أسوأ؟ هل في اعراض جديدة؟ درجة حرارتي النهارده كام؟ مشاكل في التنفس؟ و في الاول سألوا اذا كان عندي اكل و مستلزمات كفاية في البيت و هل ليا حد اعرفه يعمللي shopping مثلا
بعد ١٤ يوم الدكتور بتاعنا كلمنا ننزل نعمل Test جديد اللي هوا عبارة عن ٢ Swabs في يومين مع بعض عشان لو negative يرفعوا العزل و ارجع الشغل وكلموا مكتب الصحة و البوليس و كان مسموحلي اخرج بس اعمل الswabs و ارجع البيت علطول للعزل لحد لما النتيجة تطلع
الSwabs طلعت negative بس كان ليه عندي شوية كحة خفيفة. كلمت مكتب الصحة قالولي طالما لسه عندك اعراض هنمد العزل لحد ما نبقي Symptom free علي الاقل ٤٨ ساعة بعدها نرفع العزل و ترجع الشغل. كلمت الhouse doctor مدلي الاجازة المرضي اسبوع كمان
كده انا دخلت في ٣ اسابيع في البيت مكتوب مرضي (مش محسوب من اجازتي) و مرتبي شغال عادي مش زي مصر اللي بيتعزل ساعات بيحسبوهالهم من اجازتهم و ساعات من غير مرتب كمان. بعد كان يوم الكحة راحت بعدها ب ٤٨ ساعة العزل اترفع بس كان الاسبوع التالت خلص و رجعت الشغل اول الاسبوع الرابع.
انا الحمدلله كنت من المحظوظين لأني غير الكحة الناشفة و شوية صداع كده و تكسير خفيف في الجسم لمدة يومين مكتنش تعبان. دكتور تخدير صاحبي مثلا كانت حرارته ٣٩ و في السرير ١٠ ايام و بعد ال١٤ يوم عزل طلع positive مرتين و فضل فوق شهر معزول في البيت مع مراته و ابنه.
لما رجعت انا و زمايلي اللي كانوا positive زيي بقينا بنشتغل اكتر في عنبر الكورونا من زمايلنا اللي كانوا negative علي اساس ان نوعا ما عندنا مناعة عنهم. و لما من اسبوع دكتور عندنا جديد طلع positive عملولنا كلنا swabs حتي اللي كان عندهم و خفوا قبل كده
الPPE طبعا موجود و مفيش تعامل مع اي مريض كورونا من غير وقاية كافية. انا فاكر انا مرة مريض كانوا شاكيين ان عنده كورونا قطع نفس و الممرضة زعقت تنادي علي دكتور عشان يبدأ CPR الدكتور الالماني اللي كان معايا ساعتها قالي البس ال protective gear الاول و بعدين تدخل تعمل CPR
ال guidelines اللي هنا زي في مواقف مشابهة كتير ان الدكتور يأمن نفسه الاول حتي لو المريض بيموت و بعدين يدخل يساعده. جو فتحة الصدر و الشهامة الزايدة ملوش مكان هنا لأن اضراره كتير و بيأدي الي اوضاع كارثية. اهم حاجة الاول سلامة العاملين و الsafety Regulations قيل التعامل مع المرضي
قارن اللي حصل معايا ده بأي زميل في مصر اتصاب و هو شغال و فرق التعامل. اللي هو الناس شغالة من غير اي تجهيزات و بيصرفوا علي المستشفيات و المرضي و بيضحوا بصحتهم و صحة اسرهم و في الاخر يترفض يتعملهم فحص حتي و ساعات علي حسابهم كمان علي عكس الممثلين اللي مش من مقدمين خدمة اساسية
يطلع بقي حيوان يقولك الدكاترة الخونة اللي بتستقيل و الدكاترة الاخوان عشان بيطالبوا بابسط وسائل الحماية البدائية (اللي هي في اي مكان تانية من المسلمات اصلا) و محدش بيشتغل بدونها. و يقولك الجندي ميسيبش الميدان ساعة الحرب! محدش بيبعت جندي الحرب بدون سلاح! الدكاترة مش جنود.
للأسف يوم بعد يوم بيتأكدلي ان قرار الخروج من مصر بكل مساوئه كان من احسن القرارت اللي خدتها في حياتي. الطب في مصر فكرة فاشلة.
That being said عندي احترام كبير لكل دكتور عنده فرصة يخرج من مصر و ليه بيعافر و متمسك بالأمل ان الوضع هيتحسن.
للاسف معنديش انا قوة المثابرة و طولك البال دي
That being said عندي احترام كبير لكل دكتور عنده فرصة يخرج من مصر و ليه بيعافر و متمسك بالأمل ان الوضع هيتحسن.
للاسف معنديش انا قوة المثابرة و طولك البال دي
لسه*
طولة*
طولة*
شكرا للناس اللي قالت كلام كويس 
https://abs.twimg.com/emoji/v2/... draggable="false" alt="✌🏻" title="Victory hand (light skin tone)" aria-label="Emoji: Victory hand (light skin tone)">
" title="شكرا للناس اللي قالت كلام كويس https://abs.twimg.com/emoji/v2/... draggable="false" alt="✌🏻" title="Victory hand (light skin tone)" aria-label="Emoji: Victory hand (light skin tone)">" class="img-responsive" style="max-width:100%;"/>
