Read on Twitter
سألت بنت بتعيط ف الشارع النهاردة لو محتاجه مساعدة شالت راسها من بين ايديها و برقتلي و هزت دماغها جامد بالموافقة، و لما سألت اقدر اساعد ازاي انهارت و انا ف لحظة ثبات انفعالي و صمود تام مش عايزة اتكلم ولا اسأل في ايه غير لما هي تقول فا اكتفيت بإني اقعد جنبها و ابص قدامي
بدأت كلامها بإنها معرفتش راجل الا و حاول يستغلها جنسيا، اتعرضت للتحرش لمرات متتعدش، سواقين التاكسي و البياعين و اي مخلوق محسوب علينا دكر بصلها بصة او علق تعليق ضايقها على الاقل، غير اللي مد ايده حتى ف وجود والدتها جنبها على نفس الكنبه مثلا، حرمان و بجاحة مشوفتش زيها ف حياتي
المرعب ان هي كانت جاية و ف نيتها الانتحار، الكوبري اللي شوفتها عليه كان محل تساؤلات كتير ف دماغي عن كام حد جه هنا انهى حياته، و كنت بنكر ان فيه حد ممكن فعلا ينفذ دا و كنت بقول ان غريزة بقاءهم هتمنعهم اكيد لحد ما شوفت و اتعاملت مع شخص اوشك يعمل كدا فعلا
التحرش ممكن يتسبب ف تعب نفسي لضحيتها، فوبيا، عدم ثقة، انعزال لكن فكرة ان الموضوع تخطى كل الحدود دي و اتراكم لحد ما وصل لـ الليڤل دا حاجة ميتسكتش عليها، ذنب تشيله اي بنت اتعرضت لـ كدا و كان فيه مجال تعترض و متكلمتش
او البنت اللي استمتعت بكون حد باصصلها و بيتكلم على اساس ان دا غزل او شيء يزود ثقتها ف نفسها، ف حين انه الحيوانات اتعودت على دا بل اتحول لحق مكتسب، ان اي حد يقدر يبص، يعلق، يلمس و اه اصل اللي قدامي مش هتتكلم فا براحتي
تصنيفنا كـ بشر ثديات راقية بس انا في الحقيقة مش ملاحظة اي رُقي، فئة كبيرة من الرجالة راميين عقلهم ف الزبالة و بيفكروا باللي تحت بس، و الانيل منهم الاهالي اللي بتلوم البنت على لبسها ف حين انه مفيش شيء ملفت، او حتى لو فيه مفيش واحدة المفروض تكبس نفسها عشان المريض اللي هيأذيها
هي مش لوحدها، ظابط الشرطة او اللي مطالب يحمينا حتى مبنسلمش منهم فا معرفش المفروض نثق ف مين، متبقاش حلول غير الأذى ف المقابل و لو طلبت معايا اموت اللي قدامي هموته، مش مؤمنة ان الناس دي من حقها تعيش اساسا، لما تسلب شرف بنت اعرف ان حياتك هتتسلب في المقابل فا لو باقي عليها ابعد
الناس كل يوم بيخلقوا خذلان و اهانة و دمار لغيرهم، و الشعب دا بالذات لا يُطاق، الا من رحم ربي طبعا. مع اقل تعامل حط احتمال انه ممكن تتأذي بأي شكل، هيأ نفسك لـ دا معنويا قبل جسديا و اتعلم تدافع عن نفسك و متسكتش حتى لو غيرك سكت، يمكن تكون انقذت ناس كتير بعدك من ضرر كان ممكن يحصلهم
