ثريد قصير لازم تشوفوه عشان مهم

- مشهد ١
—
أحمد شاف حد منزل حاجة علي تويتر معجبتوش راح شاتم اللي منزلها
——
- مشهد ٢
—
محمد شاف واحدة مش لابسة حجاب دخل يتهمها بالتبرج و يشتمها

- مشهد ٣
—
أحمد [ بيلبس سلسلة ] ، قام محمود دخل شتمه و قاله عليه مش راجل ، قام أحمد اللي كان بيشتم الشخص علي تويتر من شوية زعل و اتضايق
—
محمود [ مش مهتم بشكله ] فيدخل مصطفي يتريق عليه و علي لبسه ، يقوم محمود اللي كان بيشتم البنت الغير محجبة يزعل و يتضايق

- كل شخص بيحلل لنفسه إنه يتدخل و يتنمر علي غيره و يصدر أحكام عليهم بناءاً علي حاجة عملوها ، لكن لما يجي حد يتدخل في حياته و يحكم عليه ، نسمع صياح إدعاء المثالية الكدابة و العيش في دور الضحية و إزاي الناس وحشة ، و هو من يومين بس كان بيعمل نفس اللي حصله مع شخص تاني و كانت حاجة حلوة

- ده بيرجع بسبب عقدة نقص عند الأشخاص اللي بيصدروا أحكام و يشتموا غيرهم و يتدخلوا في حياتهم ، كل واحد بيعمل كدا عشان يحس و يعوض النقص اللي جواه انه يشتم و يتعدى علي غيره ، لكن اللي ميعرفوش ان الناس بتشفق عليه

- السؤال اللي عايز اسأله ، هل انت لما تشتم اللي مش عاجبك أو تدخل في خصوصياته و تحط اراءك الجامدة فيه او تتنمر عليه هل كدا انت جامد ؟ ، متبقاش شخص بغل فوق الـ ١٨ سنة و مش عارف انك لما تخط نفسك مكان الشخص اللي بتعمل معاه ده هتضايق

- ياريت منحاسبش الناس علي أفعالهم ، احنا مش ربنا ، كل اللي علينا النصيحة بس مش الحكم أو محاسبة الناس و إصدار ضدهم أحكام ، الناس بتحاول تداري النقص علي عيوبهم بإنهم يحكموا و ينظروا علي عيوب غيرهم و يحكموا عليها ، دي غريزة النقص فبيحاول يقنع نفسه إنه كويس بالكلام و الحكم علي الناس

- لو عايز تنتقد الرسول ﷺ اوصى انك تقدم المدح في بداية الانتقاد ، لو فاكر إن ممكن النقد السلبي و بالأسلوب الأوحش دا هيبقي كلام و يعدي لا .. دايماً خلي كلامك و نقدك بـ أسلوب محترم ، أسلوب أنت نفسك تتقبله و ترضاه علي نفسك لو حد كلمك بيه ..

- يعني خلي كلامك متزوق بـ معني الكلمه و دا حلو في النقد جداً ، يعني إبدأ كلامك بـ [ هو حلو و أنت أبدعت هنا و هنا .. ] ، و اصبر شويه و قول [ لكن أنا شايف انه من الأحسن تعمل كذا في الأول و الأخر ده رأيي و أتمني أنه يفيدك ] ، متبقاش زي الحمار و تروح تشتم غيرك و تستناه يصقفلك

- لازم يكون عندك ثقافة إنك تتقبل إختلاف وجهات النظر و الأراء ، لأن مش كل الناس من بيئة او تعليم أو أيدولوجيات واحدة ، متدخلش في حياة حد ، و خلي عند ثقافة الاعتراض و النقد و مش كل حاجة تعترض عليها عشان يبان انك مختلف و جامد

- اخيراً
—
بنعرف نغلط و نشتم عادي والله .. لو راجل اصلا تشتم و انت بتواجه مش بتشتم من ورا شاشة و شايف نفسك راجل ، لكن الجبان مبيعرفش يواجه و بيكون عامل زي الفار

- كلنا بلا استثناء عندنا جزء من إزدواجية المعايير ، معايير للناس و معايير لنفسنا ، زي ثقافة [ أنا راجل و أرتبط ببنات الناس ، لكن اختي مترتبطش بحد عايزهم يقولوا عليا ديوث ] ، فيا يت نقلل منها شوية و نحط نفسنا مكان الناس