هل الحب وحده كافي للزواج ؟
——
شوف الـ Thread

- الثريد بيعبر عن وجهة نظري فقط ، و موجه أكتر للبنات

- كل علاقة لها ظروفها و عشان كدا مفيش كتالوج في العلاقات ، لكن اللي هعمله في الثريد ده هو اني هتكلم بشكل عام مش هحط قواعد و لا هحكم علي حد

- أغلب الناس دلوقتي كل همهم إنهم يحبوا ، و طول ما انت عايز تحب هتكون مندفع و مش هتشوف حاجات كتير في اللي هتحبه ممكن تكون متنفعكش أصلاً لأن مراية الحب عامية ، خصوصاً في زمن السوشيال ميديا و القصص اللي الافلام بتروجلها

- انا موجه الكلام ده للبنات لان عاطفتهم اكبر و غالباً مشاعرهم اللي بتوجهم من غير ما تشوف الحقيقة او اللي المنطق بيقوله ، خصوصاً ان في نسبة منهم بتتأثر بكلام الافلام و البلوجرز

- العلاقات بتكون متأثرة بعوامل كتير لكن اهمهم ، النصيب و دي قدرك و اللي مكتوبلك هتاخده فيها ، و انك تاخد بالاسباب ، ربنا خلق لك عين و مخ عشان تشوف و تحلل اللي قدامك و تشوف هل هو مناسبك ولا لاء

- المصيبة اللي البنات بتعملها ، انهم وقت الاختيار مش بيشوفوا اللي قدامهم لأن المفروض لما تختار تقلل من مشاعرك عشان تقدر تشوف اللي قدامك كويس ، لكن اللي بيتعمل هو انهم بيفضلوا يزودوا المشاعر و يقولوا شعارات الحب و اللي بيحب مبيشوفش و الحب اهم حاجة و اقبله علي عيوبه و الكلام ده

- لحد ما يجي وقت الجد و يتجوزوا و بعدها غصب عنك هتشوف العيوب و هتظهر حقيقتها ، لأن الحب أو مهما كانت العلاقه قريبة ، فهي غير ان ٢ يتقفل عليهم باب واحد و يعيشوا مع بعض

- اما بقا لو بحبه مش هشوف عيوبه فدي جمله مش حقيقة و مش واقعية ، معلش يعني مستحيل حد ميشوفيش عيوب و في عيوب صعب تتعامل معاها او تتقبلها ، لكن زي ما قولنا فتحت الصدر دي و رفع شعارات الحب بتكون اخرتها وحشة بنسبة كبيرة

- الحب عمره ما كان سبب كافي للزواج و مش سبب مهم من وجهة نظري ، لأنك أصلاً ممكن تحب بدل المرة ١٠ ، في اسباب كتير اهم من الحب بتكون اهم في الجواز

١- المسؤولية
—
الزواج مش زي الارتباط ، الزواج مش حب و مشاعر و محن و هدايا ، الزواج مسؤولية ، اصلاً من اللي بشوفه اغلب المرتبطين مش عارفين هما عايزين ايه من الجواز ، الجواز مسؤولية مادية و معنوية و اطفال و مشاكل و تدخلات من الاهالي و حاجات كتير

- المسؤولية في الارتباط متجيش ذرة من مسؤولية الزواج ، لأن الراجل دايماً بـ يسترخص ، بيدور علي المتعه اللي بدون مسؤلية أو ملهاش عواقب ، ده غير ان الارتباط مفيهوش مسؤولية اصلا الا شوية كلام ، هل الراجل ده يقدر يتحمل المسؤولية و لا متدلع و اخره شوية كلام

- هل اهله بيتحكموا فيه ولا لا ؟ هل زوجك قراره نابع من شخصيته و لا حد من اهله بيأثر عليه و بيسمع كلامهم ، كل دي حاجات مش بتبان في الارتباط ، كان في دراسة اتعملت في مصر بين ستات اتطلقوا بعد سنة جواز ، كانو٣٠٪ منهم بسبب ان الراجل بيتأثر بكلام اهله

٢- دينه و اخلاقه
—
الراجل اللي معاكي ده اخلاقه عامله ازاي ، بيعمل ايه لما بيتعصب ؟ ممكن يمد ايده عليكي و يشتم و يهينك ؟ علاقته عاملة ازاي مع اهله ؟ هل بار بيهم ؟ علاقته مع الناس عاملة ازاي ؟ عاداته اللي بيعملها متقبلالها و متناسبة معاكي ؟

٣- القناعات و الاختلافات
—
مفيش ٢ شبه بعض بشكل كامل ، لكن الاختلافات تكون في حدود المقبول ، القناعات العامة تكون نفسها ، لكن في العلاقات مش زي الفيزيا مينفعش احط قطب موجب جنب سالب و استني يكون في بينهم تفاهم مستحيل

- لكن اللي بيحصل ان المشاعر بتكون مسيطرة و البنت تقول لا عادي الاختلافات دي هحاول اتعايش معاها ، مستحيل تقدري ، لأن دي قناعات اترسخت في دماغكوا انتوا الاتنين طول عمركم مش هتتغير في كام سنة

٤- الماديات
—
و دي ملهاش علاقه اطلاقاً انه يكون غني و معاه عربية ، لكن ان يكون مستقر مادياً ، عنده وظيفة ، بيقدر يشغتل و يشيل مسؤولية ، مش اهله بيصرفوا عليه و قاعد في البيت ، او مش مناسب مادياً ، الحب مش هيأكلك ولا هيأكل ولادك لما تجوعوا

٥- الاحترام و العشرة
—
دي اهم حاجة في العلاقة ربنا قال [ وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ ] ،والمودة و الرحمة اهم مليون مرة من الحب ، الزواج بيستمر ٦٠ سنة مش علاقه ارتباط

- هعمل ايه بالحب و زوجك مش محترمك و مش بيقدرك او بيقدر اللي بتعمليه ، هتعملي ايه بالحب و هو بخيل و هو مش رحيم بيكي ، و هتعمل ايه بالحب و هي مش قادرة تربي و مش مهمتة ببيتها وولادها

٦- الحب بينتهي
——
دراسات كتير اثبتت ان الحب بيقل بعد أول ٣-٥ سنين من الزواج ، بسبب الروتين و الملل و المسؤوليات و ضغوط الحياة و المشاكل اللي بتحصل ، لأن الزواج مش مشــــاعر بس

- خصوصا يا جماعة ان دي علاقة ٥٠ - ٦٠ سنة ، مش ارتباط سنتين ٣ ، طبيعي هتزهق و الحب هيقل ، و اللي هيبقي هو العشرة و المودة و الاحترام اللي بينكم ، و الحب ده بمرور الوقت هيتحول لتعود

٧- التفاهم
——
لما نزلت ثريدز ازاي تفهم الراجل و البنت ، كان عشان كل واحد يقدر يفهم جزء كن تصرفات الطرف التاني ، و الحقيقة ده مش كافي ، التفاهم هو انك تكون فاهم و مقدر الافعال اللي شريكك بيعملها و ازاي تتعايش و تفهمه و يكون في بينكم طريقة للتواصل تفهموا بيها بعض

٨- العلاقة الزوجية
—
ليلة الدخلة هيتحدد عليها اساس ٥٠٪ من علاقتكم ، و في الأغلب الرجالة بتكون هي غلطانة و عايزين يخرجوا شهوتهم و تولع مراته ، ده هيقرفها منك فيما بعد ، العلاقه دي اساسها الحب من الأخر ، فلو مفهمتش هي عايزه ايه بعد كدا هتتهرب منك و مش هتكون عايزاك

- اللي لازم تعرفيه انه لو اتعامل معاكي غلط او بغشومية في العلاقة دي هتتقفلي منه مهما كان الحب اللي بينكم ، و ده بسبب ان مفيش ثقافة جنسية بين الشباب ولا البنات

٩- هل شريكك سوي نفسياً
—
دي نقطة بتكون موجودة في الاغلب في الرجالة ، انهم بيحبوا يتحكموا و يفرضوا رأيهم علي البنت في كل صغيرة و كبيرة بدون تفاهم و دي حاجة صعبة و هتخليكي تكرهي نفسك و تكرهيه مهما كان حبك له

- خصوصاً ان من أكبر و اشهر المشاكل اللي بتحصل في الزواج هو إن الراجل مش بيعترف و بيكابر بعيب عنده بيأخر الإنجاب أو بيمنعه ، مش عيب والله إنك تعترف و تتعالج لأنك مريض زي أي مرض تاني بتروح تتعالج منه ، هي مش ذنبها إنك مش عايز تعترف و تتخانق معاها إنك كويس

١٠- طاقتك هيجيلها وقت و هتخلص
—
مهما كنتي بتحبيه و مهما استحملتي عشانه و استحملتيه هو و مشاكله و تصرفاته ، هيجيلك وقت و طاقتك هتخلص و مش هتقدر تتحمليه بعد كدا

١١- الحب بيجي بعد الجواز
—
الطفل لما بيتولد مش بيختار مين تبقي امه و يحبها ، لكنه بيحبها بالوقت من اهتمامها و تعلقها و معاملتها و حنيتها و تعوده عليها ، من هنا بيبدأ يحب امه و يتعلق بيها ، فالحب بيجي بعد الجواز عادي بالحنية و العشرة و الرحمة

- الغريب ان ناس كتير بعد علاقات الحب دي بيكتشفوا إنهم مكانوش بيحبوا و إن ده كان مجرد إعجاب أو تعلق ، الحب رزق هيجيلك في وقته مش هيجيلك عشان انت عايز ، بلاش رغبتك في الحب تعميك عن حاجات كتير ممكن تيجي علي حساب روحك بعد كدا

- عايز اقول ان مستحيل هتقعدي مع شخص الا و كنتي حاسه ناحيته بالقبول و بعد كدا بيبدأ يظهر هل الشخص ده مناسب ولا لا من فكره ومن صفاته و مؤهلاته زي ما قولناها فوق ، الشخص اللي هتقولي عليه مناسب ليكي مستحييييل تكوني مش متقبلاه ، و التقبل بداية التعلق و التعلق بداية التعود و بعدين الحب

- الفكرة ان البنات دماغهم ناشفة و بيعندوا ، فبيحطوا في دماغهم فكرة واحدة بس اني عايزة اتجوز عن حب ، مش مهم بقا هل هو مناسب ولا لا ؟ و ده سذاجة و قلة نضج ، و حتى لو حصل و اقبلت بشخص مش بتحبه ، فمصيرها هتتطلق منه لانها مش مديه نفسها فرصه تحبه ، و كل اللي في دماغها انها تحب

- و مع اول مشكلة هتحصل بينهم هتطلب الطلاق و مش هتعديلهاله عشان هي مدتش فرصه لنفسها انها تحب و فكرة ان الحب قبل الجواز مسيطرة عليها مهما كان الشخص ده مناسب لها ، و غالبا البنات دي بتلبس خازوق جامد في الاخر لان ده مش نضج ، الحب رزق و هيجيلك في وقته مش هيجيلك عشان رغبـــتك

- الثريد ده رد علي فيديو مي ابراهيم ، و مع كامل احترامي لها و لكل البلوجرز و المشاهير ، فمتاخدش كلامهم و اللي ظاهرلك انه صح ، لأن دي مظاهر و مبيحطوش الا اللقطات الحلوة ، و اللقطات دي هتبهرك العلاقة قد ايه جميلة ى الحب قد ايه حلو ، لكن دي مش الحقيقة ، متنخدعش بالمظاهر

- علاقات كتير كانت ظاهرة قد ايه الحب بينهم و قصص حب خرافية و كان اخرها الطلاق و المحاكم ، متنساش [ حسام انتيكا و سلمى ] اللي كان بينهم قصة حب و صور قد ايه الحب جميل و انفصلوا بعد سنة من جوازهم و كل واحد شاف حياته تاني بعدها ، انجلينا جولي و براد بيت مثال تاني

- الخلاصة
——
ما بين الحب و الكره في ١٠٠ احساس لا هما حب ولا كره ، زي التعود و التعلق ، فـ نص الحب تعود و نصه التاني تعلق