إزاي تفهمي الراجل ؟
------
شوفي الـ Thread

١- الراجل نقطة ضعفه [ عيـنه ]
—
و دي طبيعة الراجل اللي ربنا خلقه عليها ، عشان كدا ربنا أمر الرجالة بغض البصر لتجنب الوقوع في الشهوات ، و ده اللي بيخلي الراجل عينه تكون زايغة لو مش قادر يجاهد نفسه أو مش مكفيه البنت اللي معاه سواء زوجته / خطيبته ..

- عشان كدا ربنا خلق البنات بطبيعة حب الزينة عشان تمتع زوجها ، و بعد الجواز بكام سنة بتبدأ بعض الزوجات ميهتموش بجمالهم ولا يمتعوا ازواجهم و يبدأ الاهتمام يقل به ، فيبدأ الراجل يبص لبرا ، خصوصاً ان نسبة من الرجالة بتكون متجوزة عشان الجواز و خلاص و لو قادر مادياً ممكن يتجوز تاني

٢- الراجل بعد ما يتعرض لضغوط أو يبذل مجهود مبيحبش يتكلم
—
كان في اسطورة قديمة ان الراجل في العصور الحجرية ، كان لما يرجع من رحلة الصيد ، بيقعد علي صخرة كبيرة و يريح قبل ما يدخل الكهف لزوجته و عيلته

- عشان كدا لما الراجل يكون راجع من الشغل ، او مضغوط ، بيمر بمشاكل ، .. و بما إن طبيعة البنات هي الكلام الكتير ، فاهدي عليه شوية لما يبدأ يتكلم هو و متضغطيش عليه ، عشان ميتخنقش اكتر و تتخانقوا

٣- الراجل بيتضايق و يتخنق لما تحاولي تغيريه
——
أغلب البنات لما بتدخل علاقة بيكون في دماغها انها تقدر تغير عيوب الراجل اللي قدامها علي مزاجها ، و تفضل تنصح فيه و تزن عليه عشان يتغير للطريقة اللي هي عايزاها و ده صعب جدا الراجل يعمله ان كان مستحيل

- يعني مثلاً الراجل بيدخن فالبنت تدخل معاه العلاقه و تكون فاكرة انها بطريقة ما هتقدر تغيره و تخليه يتخلي عن التدخين ، و ده صعب ، لأن الراجل مبيحبش حد يمشي كلامه عليه و بيحب يكون قوي بنفسه ، مش ان حد تاني يقويه ، الا في بعض الحالات

- تيجي هنا جملة مشهورة للبنات انهم ميتعاملوش مع الرجالة كانهم مركز تأهيل هيغيروهم حسب ما تعوزه ، لأن ده مش وظيفتها ، انتي محتاجة شريك حياة مش مشروع

- ملخص النقطة دي انك من وجهة نظرك لما تحاولي تغيري الراجل إنك بتساعديه ، لكن الراجل بيبصلها [ لو مكنش عنده الرغبة انه يتغير ] إن دي إهانة ، فاقبليه زي ما هو بعيوبه و زودي ثقته بنفسه و ادعميه و حسسيه انه ملك و هو هيتغير لوحده

٤- الراجل بيحب ينعزل لما يكون متضايق
—
و دي لها علاقه برقم ٢ ، ان الراجل لما يكون متضايق او مزاجه وحش ، بيحب ينعزل و ميتكملش مع حد لحد ما يرجع كويس و يبدأ يتكلم ، و للأسف الراجل مبيحبش حد يشاركه في عزلته دي و لو ضغطتي عليه و حاولتي تشاركيه هيتعصب عليكي و هيحصل مشاكل

- البنات بطبيعتها بتحب الرغي و الحكي لما تكون متضايقة و ده عكس الراجل عشان كدا مش بيفهموا ده و يحاولوا يضغطوا عليه انه مش بيتكلم و يفهموا انه مبقاش بيحبها او مش مهتم او بيخونها ، فأهدي عليه يومين و قوليله هسيبك لما تفك و تحكي بس

٥- الراجل بيتخنق من الاهتمام الزايد و الزن
——
الراجل بيحب الاهتمام و ان حد يكون مهتم بيه بس بشكل معتدل ، لكن في نفس الوقت بيحب يكون حر ، فـ لما يزيد الاهتمام عن حد معين بيبدأ يتخنق ، يعني مثلاً الراجل مبيحبش كل شوية تسأليه رايح فين او تحاولي تكميه كل دقيقتين تطمني عليه

- برضو الزن بيخنق الراجل ، بسمع ان بعض الامهات بتقول بناتها تزن علي زوجها عشان تاخد و تعمل اللي هي عايزاه ، ممكن هتعملي اللي انت عايزاه و الراجل هيريح دماغه من الزن ، بس بعد كدا هيتعامل معاكي ببرود و هيزهق منك

٦- الراجل مبيحبش الرغي الكتير و التلميحات
—
اطلبي من الراجل اللي انتي عايزاه بشكل مباشر بدون كلام كتير و بدون تلميحات ، الرجالة بتحب البساطة و بتجيب من الاخر

٧- حسسي الراجل انه برنس و عيشيه في الدور
—
الراجل زي ما قولنا بيحب يتقدر و حد يخليه يحس انه الوحيد اللي يقدر يعمل كدا و الوحيد اللي بيفهم و يقدر يحل كل حاجة ، فحسسيه بالثقة و ان مفيش زيه وقتها هتكوني حطتيه في جيبك

٨- الراجل عامل زي الأستك
—
من طبيعة الراجل ان العاطفة عنده مش كبيرة ، فبيجي في وقت من العلاقة بتلاقيه بيبعد لوحده و اهتمامه قل بيكي ، مبقاش يتكلم كتير زي الاول ، ... الراجل وقتها بيلجأ للأسلوب ده عشان يجمع عاطفته و مشاعره من تاني و يرجع تاني يقرب لوحده

- فالراجل بيحتاج مساحة ، عشان يقدر يرجع تاني زي الاول ، فلو فضلتي تقربي منه هو برضو هيفضل يبعد عشان هو محتاج مساحة فعلاً
—
الحل إنك تسيبيه لوحده حر و هيرجع تاني لوحده زي الاول ، للأسف هي دي طبيعة الرجالة و عشان كدا الفترة دي ممكن يحصل فيها خيانة من الراجل

- في النقطة دي فالبنات عندهم وفاء اكتر من الرجالة و مش بيبعدوا و بيكونوا جمبك

٩- الراجل بيعرف يعمل Task واحد بس
—
البنات ما شاء الله Multi tasking بيعملوا كذا حاجة في وقت واحد ، عكس الراجل مبيعرفش يعمل الا حاجة واحدة بس ، فمثلاً لما يكون بيشتغل او سايق او بيعمل حاجة لوقت طويل تفتكري انه ناسيكي و مش مهتم ولا بيتكلم ، هو مبيعرفش يعمل الا حاجة واحدة

١٠ - الراجل بيهتم بالحاجات الكبيرة و بيهمل التفاصيل و الحاجات الصغيرة
——
الرجالة بتهتم بحجم اللي بتعمليه ليهم مش بعدده ، عكس الستات اللي بتهتم بالعدد مش بالحجم

١١- بلاش تحطي الراجل في وضع دفاعي و تستفزيه بالكلام عشان انتي اللي هتزعلي
——
الراجل لما بيحس بهجوم عليه او انتقاد باسلوب مستفز و بيحاول يغلطه بيحصل حاجة من ٢
- يا اما بيعند اكتر و يستفزك
- ياما هيتعصب عليكي
—
خديه علي قد عقله يا بنتي

١٢ - نادر ان الراجل يعتذر
—
للاسف من طبيعة الراجل و خصوصاً في مجتمع زي مجتمعنا انه يشوف نفسه مبيغلطش و حتى لو حس انه غلط بيكابر انه يعتذر عشان دي بالنسباله اهانه

١٣-
كلنا مصطفى ابو حجر

- احياناً بيحصل لما الرجالة تحس ان حد بيحبها ، بيبتعدوا عاطفياً او بيتعاملوا ببرود عاطفياً مع الطرف الاخر و ده علاجه ان تكتب كل مشاعرك اللي في دماغك و هتكتشف ان اللي بتحبه بتحبه بدون سبب

- بالمناسبة الثريد ممكن يبان انه اوفر ، لكن الصفات دي مش شرط تكون موجودة كلها في نفس الراجل ، لكن هتلاقي اغلبها و ده بيرجع حسب تربيته و اللي اتعلمه و المواقف اللي عاشها و اثرت فيه و في شخصيته

طب والله احنا سالكين و ابسط مما تتخيلوا

البنات و هي بتحاول تفهم الرجالة

للرجالة
—
عندك كام صفة من دول ؟

للبنات
—
فاهمين كام صفة من دول

ان شاء الله بكرا هحاول اعمل ثريد ازاي تفهم البنات استعدوا يا رجالة