Ye thread unlogoon k liye hai jo abhi bhi soch rahe hein k corona virus mehaz aik new world order ki saazish hai ya ye azaab sirf kafiroan k oper aaya hai unki harkaton ki wajah se aur isse musalman ko koi darne ki zarorat nahi.

Mein apne mulk k teen sabse barre hospital mein kaam karta hoon aur mere kaam ki nauyiyat kuch aisi hai k meri access har jagah hai.
Aur jo mein pichle do haftoan se dekhraha hoon woh beyaan karta hoon.

In do haftoan mein humne din raat kaam karke 60% hospital k kamre aur ICUs ko covid19 units mein tabdeel kardia hai. Aur is weekend 4 floors naye tower mein ready karne k baad almost 90% hospital covid units mein convert hojayeinge.

Kuch din pehle mein ICU mein tha kuch kaam k silsile mein aur jo meine dekha woh jitni zindagi bachi hai bhool nahi paonga.
Aik patient jo shayad 50 saal ka hoga khaanse jaraha hai aur aik lafz nahi bol paraha. Abhi ventilator pe nahi tha, nurse usko kuch administer karahi thi.

Uski khaansi itni shadeed thi k uska purra jism shake karaha tha. Aur woh physically fit aadmi jo aik do second khaansi k beech mein milrahe thy ro raha tha.
Allah ye kisike saath na kare. Aur mujhe nahi pata uske saath kya hua lekin dua karta hoon k Allah ne usse shifayaab kare.

Kal mein naye covid intensive care mein gaya. Jahan 18 kamroan mein patients thy. All in induced coma and on ventilators.
Abhi kaam khuttum hi honewala tha k page hua code blue (heart attack patient). Aur nursing staff aur drs bhaage us kamre mein.
Bahot koshish ki lekin woh nahi

Bachpayi.
Bahar aake dr ne nursing station waloon ko bola k ICU waloon ko bolo 3 bed aaj late afternoon tak tyaar hojayeinge.
Iska matlab aap khud samajh lein.

Toh mere woh saare bhai jinka islam masjid na jaane pe khutre mein aajata hai woh bilkul masjid jayein aur apne masjid k bhaiyoon k saath masjid ka darvaza band karke wahi rahein.
Bach toh sahi, worna Allah se apni maghfirat ki dua karte rahein.

Bas ghar wapis na aayein. Kyon k khud ko marna hai toh marrein, apne saath apne gharwaloon aur mohalle waloon ko na maarein.

Jabtak vaccine nahi aati iska sirf yahi ilaaj hai k total lockdown ya jinke liye ye mumkin nahi toh woh social distancing observe karein.
Kyon k virus ka koi mazhab nahi woh bila tafreeq maar raha hai.
Agar virus musalman hota toh iran mein hazaroan nahi marte.

Na hi saudi arab ko haram band karna parta.
Abhi bhi kuch hosh karein aur ghar mein namaz parhein. Qabool karne wala Allah hai masjid ka imam ya koi naamvar maulana nahi.

Aur bajaye in bewaqoofi ki debate mein parrne k keh masjid kyon band kari, apne apne mohallon mein 65 saal se oper k logoon ki list banayen aur unki madad karein cheezien laane mein. Agar koi mushkil ho toh unko hospital pahaunchane mein.

Koi mulk bhi baghair apne citizens ki active participation k kaamyaab nahi hosakta.
Toh bhai ye time hai jahan apni zaat se barhke sochein.

These are my two cents. Meri toh phutti parri hai. Har waqt ye khayal aata hai k kahin mein virus ghar na lejaon.

Mere paas toh choice nahi, jinke paas hai khudara ehtiyaat karein.

@potaydur
@ASYusuf
@KamranShafi46
@NaPoha_
@nidkirm