علاقة الجمال و الشكل الخارجي بالحب و الإعجاب و الفرص ..
——
شوف الـ Thread

- قبل أي حاجة فالجمال شئ نسبي ، مفيش معايير ثابته للجمال ، كل واحد له ذوق معين بيحدد علي أساسه معايير الجمال الخاصة به ، يعني ممكن أكون شايف حد إنه أجمل شخص شوفته ، و حد تاني يقول علي نفس الشخص انه مش حلو إطلاقاً

- للاسف في ناس بتكون جمالها عادي أو مألوف ، عمرهم ما اتقال ليهم من حد أنه جميل ، خصوصاً في فترة المراهقة و الشباب ، فبيكون نفسهم إن حد يقول لهم [ أنت جميل ] عشان يجرب هيحس بإيه لما تتقاله الكلمة ، أو بمجرد ما يحس إن الناس اللي حواليه شايفينه جميل

- فكرة ان مفيش حد يقولك انت جميل ، مع مرور الوقت و مع المقارنات ، هتبدأ تكره نفسك و شكلك و هتفقد ثقتك في نفسك خصوصاً لو كان الكلام ده في مرحلة المراهقة ، لأنك وقتها مش بتكون ناضج بشكل كافي ، يمكن حتى لما تنضج بيكون للموضوع ده أثر جواك و بيأثر علي نظرتك لشكلك

- الشكل و الاعجاب
---
خلينا متفقين ان مفيش حد هيعجب بيك من شخصيتك الا بدون ما يتكلم معاك ، و عشان كدا الاعجاب هو بنسبة ٩٠٪ بيكون علي اساس الشكل ، مفيش حد هيعجب بيك من شخصيتك من اول ما يشوفك ، لكنه هيعجب بشكلك

- ده المبدأ اللي بيعتمد عليه فكرة [ الكراش ] ، مفيش حد هيكراش علي حد بدون ما يتعامل معاه عشان شخصيته اللي ميعرفش عنها اي حاجة ، لكنه بيكراش علي الشكل عشان فلان عجبه

- المشكلة ان الناس بتضحك علي نفسها في الجزء ده ، لأن الشكل مهم و عامل رئيسي انك تعجب بشخص ، أصل محدش هيشوف شخص لاول مرة و يقول الشخص ده شخصيته حلوة !! كدا بنضحك علي نفسنا

- الفكرة إن الشخص اللي جماله عادي ، نفسه إنه حد يعجب بيه ، نفسه يحس بإحساس إن الناس تشوفه جميل ، في ناس بتعيش عمرها كله بدون ما تحس إنها جميلة ، لدرجة انه أحياناً بيسيطر عليه فكرة أنا مستحيل حد جميل يحبني عشان انا اقل منه في الشكل

٢- الجمال و الحب
—
الجمال و الشكل الخارجي ملوش أي علاقة بالحب ، الحب مش معتمد علي المظاهر ، فلسفة الحب إنك تحب الإنسان نفسه - افعاله - تفكيره - .. ، و ده بنشوفه كتير ان ناس جميلة بتحب ناس عادية و عادي جدا

- عشان كدا مفيش حاجة اسمها حب من أول نظرة ، زي ما قولنا ده اسمه اعجاب ، مفيش حد هيحبك من شخصيتك من أول نظرة ، و العلاقات اللي بتسمع عنها إنها حب من أول نظرة ، هي بتكون إعجاب و بعدين بيتعرفوا علي بعض لو شخصيتهم مناسبة بيكملوا و لو لا مش بيكملوا

- مع إحترامي فاللي بيعلق نفسه عشان أعجب بحد ، و يوهم نفسه إنه بيحبه و هو أصلا ميعرفش شخصيته ولا يعرف هو مين ولا يعرف ميوله و تفكيره ، فهو شخص ساذج ، لأنك بتعلق نفسك بمجهول و بتعيش نفسك في وهم مش حقيقي و هتكون ضحية نفسك

- زي ما الجمال حاجة حلوة في الاعجاب ، إلا إنه بيكون أحياناً نقمة في الحب ، خصوصاً عند البنات ، لأن البنت الجميلة بيكون الإعجاب بيها كتير و الاقبال عليها بيكون كبير ، في مثل بيقول [ بارت من كتر عرسانها ] لأن الاختيارات حولها كتير فبتشتت

- حتي لما بترتبط سواء رسمي او غير رسمي ، فلسه برضو في ناس معجبة بيها ، و ناس بتحاول تقرب منها ، و ده طبعاً بيزود غيرة الراجل اللي معاها ، و بيؤدي للانفصال في بعض الأحيان

- سبب كمان مهم و في دراسة في جامعة هارفارد ، و هي ما يسمي بـ [ ملكة النحل ] و هي إن البنت بتحب يكون الكلام عليها و تلم العيون حولها ، خصوصاً لو كانت جميلة فده بيزود غرورها و بيخليها تحب ان الناس تعجب بيها و تلفت الانتباه

- الشكل و الفُرص
—
دي حاجة واضحة جداً الأيام دي و هي إن فرص الشخص الجميل أكبر من الشخص العادي في العمل ، حتي ان فيه بعض الوظائف بتختار الشكل علي حساب الكفاءة

- من فترة كنت بتناقش انا و صحابي مين أكتر شخص محظوظ في العالم ، واحد منهم قال [ البنت الجميلة الغبية ] ، طبعاً الرزق بأيد ربنا ، لكن دي حقيقة ، لأننا بنهتم بالمظاهر ، فجمال البنت ده هيتم التجارة بيه و ده أقصي مراحل الغباء ، لكن لو ذكية فعلي الاقل هتفكر شوية في قرارتها

- و بصراحة فعلاً الجمال ممكن يدي للشخص مكانه هو ميستحقهاش ، الجمال بيكون معيار أكبر من الكفاءة أحياناً ، إبسط دليل إنك هتلاقي مذيعات معندهمش بـ ٢ جنيه كفاءة و كل مؤهلاتها شكلها الجميل و واخدة مكان واحدة أكفأ منها مليون مرة لكن مش علي نفس درجة الجمال

- ده بيرجع لجملة قالها تولستوي [ انه امر مدهش مدي اكتمال الوهم بأن الجمال هو الخير ] ، ده غير ان دراسات كتير اظهرت ان الناس الجميلة بتاخد تقييمات أعلي في معدلات الذكاء و الكفاءة أكتر من غيرها ، و ده راجع لأن الناس بتشوف الشخص الجميل إنه أكفأ و اذكي من غيره

- ده بيخلي أغلب أدوار الشر في المسلسلات و الأفلام بيأديها أشخاص جميلة و شكلهم حلو عشان تتعاطف معاهم ، دور برلين في لاكاسا ، دور توماس شيلبي ، دور انجلينا جولي في salt و غيرهم ، كل دي شخصيات شريرة بتتعاطف معاهم لأنهم شكلهم حلو ، و ده اللي المخرجين بيلعبوا عليه

- علاقة الجمال الخارجي بالجمال الداخلي
—
الجمال الخارجي طبعا له تأثير مهم علي الجمال الداخلي ، الشخص اللي شكله جميل هتتفتح له أبواب كتير ،حتي لو اتحط في منافسه مع شخص جماله عادي هينجح فيهارعشان هو جميل و ده هيأثر بشكل إيجابي عليه و يكون متفائل و ثقته تزيد في نفسه

- عكس الشخص اللي جماله عادي ، لما يترفض في شغل عشان شخص تاني اجمل منه ، او ميلاقيش حد معجب بيه ، كل الحاجات دي بتأثر في نظرته لنفسه و يبدأ يكره نفسه و شكله و يحس بإحباط إنه مهما عمل في حاجة هتمنعه ، بسبب سطحية الناس

- زي ما قولنا ان الجمال شئ نسبي ، لكنه برضو معتمد علي إنك يكون شكلك Special بمعني إن مثلا أنت شكلك عادي في مصر مفيش حد بيقول عليك جميل ، لكن لما تسافر أوروبا مثلا هتلاقي الناس بتبصلك و معجبة بيك ، عشان أنت مختلف علي الذوق اللي هناك

- شخصية زي نيروبي ، هي جمالها عادي و في بنات كتير جدا جدا في مصر نفس الملامح و نفس الجمال بتاعها ، لكن نيروبي الناس بتتغزل في جمالها علي السوشيال ميديا عشان هي Special و مختلفة عن الباقي

- طبعا الشكل الخارجي معيار لأنك تتجاوز لشخص عن سوابقه ، أحمد عز بالرغم من عدم اعترافه بولاده و مشاكله المعروفه ، الا ان البنات بتكراش عليه عشان وسيم ، مع إن مشكلة أخلاقيه زي دي لو حد شكله عادي عملها او مش وسيم هتسمع كلام من بتاع مجتمع ذكوري

- او مثلاً لما واحد يبعت مسدج و شكله مش وسيم تلاقي البنت خدت سكرين شوت و فضحته ، في حين انه لو وسيم لو مردتش عليه فمش هتفضحه ، و بالمثل مع الولاد ، عموماً الشكل عامل مهم بيؤثر علي رد فعلك و علي مواقفك كمان

- لو حابب تتناقش في الثريد https://ask.fm/Bluurr11?utm_source=copy_link&utm_medium=iOS&shareBy=Bluurr11

تقييمك للثريد

- ممكن تكون مش شخص جميل ، مش شخص الناس معجبه بيه ، لكن الأفضل من انك تكون جميل انك تكون Special بشخصيتك ، الجمال نسبي و هيزول ، ممكن بس تكون مش شايف نفسك جميل عشان انت مش في المكان المناسب

https://twitter.com/bluurr11/status/1130234303118495745?s=21 https://twitter.com/bluurr11/status/1130234303118495745