مناعة القطيع دي عاملة بالظبط زي ما بلطجي يجي عشان يدشملك، لو انت لوحدك هايستفرد بيك ويعجنك، بس لو جالك في منطقتك الناس هتتلم، هو يقدر يضربك ويعجنك، بس ناسك اللي هما قطيعك بيحموك.
انت ماعندكش مناعة، بس المحطيين عندهم؛ فدايرة العدوى مكسورة والمرض مالوش حتة ينتشر فيها، فبيختفي.

عشان تعملها بتنزل تتطعم الناس لحد ما توصل لـ threshold معين، عنده قطعيك يقدر يحميك حتى لو انت لسا ماعندكش مناعة.
لو طعمنا الفتيات ضد الحصبة، الفتيات دي مش هتعدي الذكور بفعل مناعتهم المباشرة من التطعيم، وكذلك الذكور مش هتعدي بعض وهو دا تأثير مناعة القطيع.

عشان تحدد الـ threshold دا لازم تبص لحاجة اسمها الـ basic reproduction ratio ورمزه R0، دا ببساطة عدد الحالات اللي حالة مصابة هتاخدها في رجلها، زي أي نصباية تسويق هرمي كدا، هتجيب تحتك كام واحد؟!
شلل الأطفال مثلا 6 والحصبة 18

فلو عندك فيروس الـ R0 بتاعه 2 تلاقي المريض الواحد بيجيب 2 والـ 2 يجيبوا 4 فتمشي 2 4 8 16 32 64 128، بس لو انت عندك نص السكان عندهم مناعة، يجي المريض يعدي 2 يلقى واحد عنده مناعة فيعدي حالة، والحالة تجيب حالة وتمشي 11111 ويبقى دا threshold تحقيق مناعة القطيع داخل المجتمع دا.

فلما تيجي تنزل تتطعم، تلاقي نفسك محتاج تتطعم النص، ودا يحمي لك الباقي.
طاب جميل يلا نعمله في الكورونا بقى! خد نفسك واستنى كدا يا معلم وتعالى نشوف الـ threshold المطلوب للكورونا كام، تلاقي الـ R0 بين 2،3 ناخد الوسط تلاقي النسبة 60%

كل الكلام اللي فوق دا جميل جداً ورائع وممكن يتعمل، بس عن طريق التطعيم! الكوفيد 19 لسا ضيف جديد وتقيل علينا مالوش تطيعم. والطريقة الوحيدة عشان تكتسب مناعة ضده هي إنه يصيبك وجسمك يقاومه وتتعالج، وعاش يا معلم انت كدا فل الفل وبقيت منيع، بس مناعتك دي شكلها عامل ايه؟!

هل هي مناعة قصيرة الأمد ولا طويلة الأمد؟ انا لسا قايلك فوق دا ضيف جديد وخدنا على غفلة، وبالتالي مافيش لا داتا كفاية ولا أبحاث كبيرة وحاسمة تقدر تقولنا نوع المناعة اللي بيقدمها ايه، وأي معلومات في هذا الصدد إلى الآن هي مجرد افتراضات بلا أرضية قوية.

بس ضيفنا دا مش مقطوع من شجرة وله 6 أخوات بيصيبوا الإنسان، لو بصينا عليهم، نلاقي 4 بيجيبوا برد وبيدوا مناعة 3 شهور، تلاقي الـ MERS بيدي سنة، والـ SARS بيدي 3 سنين.
فأغلب الافتراضات أنه زي اخواته الاشرار وهايديك مناعة طويلة الأجل من 2 لـ 3 سنين.

حلو يعني مناعة طويلة زي التطعيم اهو، نعملها بقى؟! استنى بس يا زميل. هنا هتلاقي مشكلتك التانية، التطعيم فعال ومجرب وآمن وبلا مضاعفات خطيرة، أما الاصابة بالفيروس مليانة مخاطر ومضاعفات وممكن بكل بساطة تموت. وهنا تظهر لك التكلفة البشرية للمنهج دا.

صاحبنا الجديد دا لسا شغال وإلى الآن مافيش أي standardization of death rates وعشان كدا بنشوف تفاوت رهيب في نسب الوفيات من دولة للتانية، بس خلينا نشوف في حالة مغلقة للفيروس؟ هنلاقي حالة واحدة فقط في اليابان وهي diamond princess Cruise ship، ودي معدل وفياتها تقريباً 3.5%.

خلاص معانا مناعة طويلة وعارفين معدل الوفيات نطبق القطيع بقى؟! هنا تظهر لك مصيبة كفاءة النظام الصحي وقدرته على تحمل الاصابات اللي هتبقى بالملايين، والوفيات بمئات الآلاف. ويفرقع الأمر في وشك وتبقى لا عارف تسيطر على كورونا ولا تعالج غير الكورونا فينهار النظام الصحي.

طبعاً مناعة القطيع كلمة جذابة، بس هي مش مناعة بشكلها الحرفي ولكنها حماية بتاخدها من أقرانك في القطيع، واللي في حالة الكورونا بتبقى بترميهم في معركة مدمرة بدون أي ضمانات بالنجاة. وفي أكثر السيناريوهات تفائلاً فأنت مازلت طالع خسران.

فلا ماينفعش تفتح الباب ع الغارب، وماينفعش ترجع لحياتك الطبيعية الآن؛ حماية لنفسك ولأحبائك اللي مش هتكون مضطر تودعهم لو ألتزمت بإجراءات الوقاية والمباعدة الاجتماعية.

الإجراءات دي بقى هتفيدك بأيه؟ احنا لسا قايلين إن الـ R0 للفيروس مابين الـ 2،3بس لما تلتزم بالمباعدة الاجتماعية ممكن تنزل بيها لواحد ونص، والهدف الأكبر انك تنزل بيها لواحد صحيح فقط لا غير. وهنا هتوصل لحالة ثبات وتبطط القرف.

ودا هايمكّنك من إدارة أفضل للأزمة وتتبع أفضل للعدوى وتقديم رعاية طبية لائقة للمصابين تقدر من خلالها تنزل بمعدلات الوفاة. إلى أن نصل يوماً لـ R0 اقل من 1 ويبدأ المرض يختفي، أو نطلع بعلاج أو تطعيم وتعمل أحلى مناعة قطيع يا معلم.
خليك في البيت يا محترم.
سلام ⁦⁩