Read on Twitter
بقالي فترة بفكر أكتب الكلام ده لإني وقت ما كنت في أقصى مراحل المعاناة مكنتش أتخيل إن هييجي يوم تكون فكرة الانتحار أبعد ما يكون عن راسي ويمكن فيه حد محتاج يسمع الكلام ده.
كل واحد بيتعامل مع تجربته بطريقته بس أنا دي شوية الحاجات اللي تجربتي علمتهاني: https://twitter.com/youssefmnN/status/1191459741878423552">https://twitter.com/youssefmn...
كل واحد بيتعامل مع تجربته بطريقته بس أنا دي شوية الحاجات اللي تجربتي علمتهاني: https://twitter.com/youssefmnN/status/1191459741878423552">https://twitter.com/youssefmn...
١) القلق والاكتئاب مش وصمة ومش عيب ونسبة الناس اللي فاهمة ده بتزيد كل يوم عن اللي قبله. متتكسفش تطلب المساعدة ومتتكسفش تشوف دكتور
٢) لو مؤمن بربنا حاول تقرب منه، بس لو مش مؤمن متزعلش من الناس اللي هتقولك صلي أو إدعي. تجربة الاكتئاب صعب جدا على حد مجربهاش إنه يتخيلها فهتلاقي كل واحد بيقول اللي هو فاكر إنه هيساعدك.
اللي متمسك بالدين هيقول لك صلي لكن ناس كتير هتقول حاجات زي "كل الناس بتكتئب" أو "لا يا راجل انت زي الفل". خد الحب اللي ورا الكلام وسيب الكلام نفسه.
٣) ممكن مترتاحش مع أول دكتور تروح له. متيأسش. ده مش زي دور البرد ومش كل الدكاترة هتريح كل الناس. جرب تاني لحد ما تلاقي اللي أسلوبه مريحك ومساعدك تقول اللي في قلبك بس المهم متفقدش الأمل
٤ ) متلعبش في الدوا. متلعبش في الدوا. متلعبش في الدوا. إعمل اللي الدكتور بيقول عليه لإن فعلا الافتكاس في الأدوية خطر.
٥) متصدقش اللي الاكتئاب بيقنعك بيه. أنا لما اتحسنت اكتشفت إن كان فيه ناس كتير جدا كنت ظالماهم لما قلت لنفسي "مش هيهتموا" أو "هيزعلوا شوية وينسوا" لو انتحرت . مهما الاكتئاب خلاك تتخانق مع نفسك، لازم تصدق إن الدنيا أجمل بيك فيها وإن ألم غيابك مش هيكون هين
٦) وسط العلاج بعد ما تبدأ تتحسن بفترة هتلاقي نفسك انتكست شوية. متحبطش وتفتكر إنك هترجع لنقطة الصفر. دي مرحلة طبيعية ولازم هتعدي بيها عشان تكمل التحسن
٧) لما إن شاء الله تتحسن، ممكن تبتدي تبص لسنين الاكتئاب وتزعل على فرص عدت أو ناس بعدت. سامح نفسك. اللي تقدر تصلحه صلحه من غير استماتة واللي ماتقدرش سامح نفسك عليه. إنت عملت اللي كان ضروري للفترة دي ودلوقتي احتياجاتك مختلفة.
٨) لو من هواة الشعر والفلسفة، لو مفيهاش إساءة أدب يعني بلاش الحزن الزيادة. ده مش معناه انه نحصر نفسنا في كل ما هو تافه وسطحي، بس مش لازم الشعراء المنتحرين اليومين دول 
https://abs.twimg.com/emoji/v2/... draggable="false" alt="😂" title="Face with tears of joy" aria-label="Emoji: Face with tears of joy">https://abs.twimg.com/emoji/v2/... draggable="false" alt="😂" title="Face with tears of joy" aria-label="Emoji: Face with tears of joy">
٩) متتكسفش تبعد نفسك عن الناس اللي وجودها في حياتك مؤذي واللي بتدوس على مواضع الألم لدواعي التباهي أو الفضول أو التسلي أو عقد النقص، مهما كانوا غاليين عليك. اتمنى ليهم الخير ودور على الخير لنفسك بعيد
١٠) مش لازم تكون بتفكر في الانتحار أو عندك "أزمة حقيقية" عشان تشوف حد متخصص. ممكن تكون ببساطة مش سعيد والحياة أهم وأجمل من إننا نكابر ونعيش تعساء لمجرد إننا مش شايفين مشاكلنا كبيرة كفاية أو شايفين ناس تانية بتعاني أكتر
من وانا صغيرة جدا كنت طفلة متوترة وقلقانة وده كان بينعكس في الشخصية اللي الناس بتعتبرها "بتسمع الكلام" أو "مؤدبة وناضجة" وكانت درجاتي كويسة جدا وبالتالي محدش حس إن القلق ده مشكلة حقيقية.
لما دخلت إعدادي اللي الموضوع بدأ يظهر في صورة غضب مكبوت كتير وصداع نصفي مبيروحش تقريبا خلا دكتور الباطنة -بعد استبعاد كل الأمراض العضوية الممكنة على مدار سنتين أو أكتر- يكتب دوا نفسي، وعشان كدة أهلي يقرروا إني أشوف حد متخصص.
مظبططش من أول مرة وبعد فترة قليلة بطلت أروح. الفترة دي صادف إنها كانت فترة كويسة في حياتي وأقنعت نفسي إن المشكلة اتحلت وانا كويسة مع إن الأعراض كانت مستمرة ومن سيء لأسوأ.
على ما وصلت تالتة ثانوي كنت داخلة في اكتئاب عنيف وناس كتير لاحظوا إني مش كويسة لكن افترضوا إن ده تأثير ثانوية عامة. كانوا شايفين إن دي حاجة مؤقتة لكن نتيجة الثانوية حاجة دائمة هتأثر على باقي حياتي فكانت دي الأولوية ظاهريا.
دي كانت الفترة اللي قررت فيها إني مش قادرة أكمل وكان فاضل بس أقرر إمتى وازاي.
فاكرة إن حد من فترة بعتت ليوسف إن لطف التعليقات وجعها والجملة دخلت قلبي فورا
ده لإن لما أهلي صمموا نشوف دكتور تاني (بعد ما بقيت شبه مبقومش من السرير بالأيام) أنا عيطت طول الليل. فكرة إن حد يخليني أرجع عن قراري واضطر استحمل تلاتين ولا أربعين سنة كمان على كوكب الأرض كانت مرعبة حتى لو أنا اللي كنت بطلب المساعدة.
أنا انهاردة ممتنة أشد الامتنان إني رجعت عن قراري ورحت للدكتور وممتنة إني قدرت اتحسن وأشوف الدنيا بعين غير عين التوتر اللي مش شايفة فيه غير مخاطر أو عين الاكتئاب اللي مش شايفة حاجة يتعاش لها. ممتنة لأهلي وللصحاب اللي عرفتهم بعد كدة اللي بحمد ربنا على وجودهم في حياتي كل يوم.
وأخيرا ممتنة جدا لوجود ناس بابها مفتوح على الرغم من العبء النفسي الرهيب اللي ده بيمثله و لاستعدادهم التام لتقديم المساعدة غير المشروطة. ربنا يجازيكم خير دائما وأبدا.
كل الحب والأمل والدعاء لكل اللي محتاجه دلوقتي https://abs.twimg.com/emoji/v2/... draggable="false" alt="♥️" title="Heart suit" aria-label="Emoji: Heart suit">https://abs.twimg.com/emoji/v2/... draggable="false" alt="♥️" title="Heart suit" aria-label="Emoji: Heart suit">https://abs.twimg.com/emoji/v2/... draggable="false" alt="♥️" title="Heart suit" aria-label="Emoji: Heart suit">
كل الحب والأمل والدعاء لكل اللي محتاجه دلوقتي