تعمل إيه لو رجع بيك الزمن ٣٠ سنة لـ ورا ؟
شوف الـ Thread ..

- أغلب اللي متابع الأكونت شباب لسه في بداية حياتهم ، في الـ Thread ده إجابة ناس كبيرة في السن علي سؤال [ هتعمل إيه لو رجع بيك الزمن ] أو [ هتعمل إيه لو أنت في نفس سني ؟ ] ، الغرض من الـ Thread ده هو نصائح للناس عن طريق تجارب الأكبر منك ..

١-
كان نفسي أعيش حياتي اللي أنا عايزها ، أعمل اللي بحبه .. مش أعيش الحياة اللي فرضها عليا المجتمع .. أنا عندي ٥٠ سنة ، المرات اللي عملت فيها اللي بحبه تتعد علي الصوابع ، حياتك مش هتعيشها إلا مرة واحدة .. فـ بلاش تضيعها و عيشها بالطريقة اللي تحبها

٢-
إتجوز يابني بدري لو في فرصة و خلي الفرق بينك و بين عيالك صغير .. عشان تعرف تصاحبهم و تفهم دماغهم .. الفرق بيني و بين ابني الكبير ٣٢ سنة .. فرق كبير مش كدا ؟ شوف كام جيل بنا ؟ بحاول أصاحبه بس لا أنا فاهمه ولا هو فاهمني و دايماً في دوامة .. تفتكر هعيش لما أشيل أحفادي ؟

٣-
إسمع كلام أهلك .. قدامهم بس .. قولهم حاضر كلمة حاضر بتريح .. و بعدين إعمل اللي تحبه .. دي حياتك يابني و انت حر تعيشها بالطريقة اللي تحبها .. شوف شغفك فين و اجري وراه .. متخليش أهلك يضيعوا شغفك

٤-
كان ليا صاحب .. تقدر تقول أكتر من أخويا عشرة ٤٣ سنة كنا دايماً مع بعض .. لحد ما ربنا إفتكره .. و من يوم ما مات و أنا حاسس إني لوحدي .. بس تعرف أنا مبقتش خايف من حاجة من بعد موته

٥-
ياريت ارجع مكانك تاني .. ياريت يبقي عندي ورقة بيضا تانية أشخبط فيها من جديد .. كنت هعدل حاجات كتير غلط عملتها .. ياريت كان ينفع أرجع تاني صغير .. الحمد لله يابني

٦-
بص يابني محدش هـ يعاقبك علي قرارتك .. أو هيفرح بـ نتايج قرارتك غيرك .. الباقيين أخرهم يشاركوك جزء بسيط جداً من من النتايج دي مهما كانوا قريبين منك .. صاحب نفسك عشان محدش هيفضل معاك غيرها

٧-
بس دي مش حياتي !! أنا كان عندي خطة أكبر من كدا بكتير .. كان عندي أحلام كتير نفسي أحققها .. عارف ايه اللي خلاني محققهاش ؟ كسلي .. الكسل خلاني أعيش حياة أنا مش عايزها .. ياريت يرجع بينا الزمن تاني والله ما كنت هكون كسلان

٨-
إتجوز متأخر .. لحد ما تعمل فلوس عشان تعيش ولادك و مراتك في مستوي حلو .. عشان لما ابنك يطلب منك حاجة تجيبهاله و متحرموش منها

٩-
تعرف برغم إني خسرت كتير .. لكن أنا فرحان جداً و أسعد إنسان بـ قراراتي برغم إنها خسرتني كتير .. صدقني يابني حتي لو القرار اللي أنت خدته من نفسك كان غلط بس أحسن ١٠٠ مرة من قرار صح و حد فرضه عليك

١٠-
إتجوز بدري .. عشان تلاقي حد يسندك و يشارك حزنك قبل فرحك .. مش لازم تجيب عيال بدري .. بس مراتك هتهون عليك كتير أكتر من لما تكون لوحدك .. إتجوز بدري و اعملوا ذكريات حلوة تفتكروها لما تكبروا و تضحكوا عليها

١١-
إتجوز متأخر يابني .. لحد ما تشبع من الدنيا و تعمل كل اللي في بالك .. الجواز مسؤليه كبيرة هيخليك تفكر في الحاجة ١٠٠٠ مرة قبل ما تعملها .. خصوصاً لو عندك عيال هتشد في شعرك

١٢-
أنا كنت جميلة جداً .. كان بيتقدملي كل يوم عريس تقريباً .. لكن كنت مغرورة كنت برفض العريس عشان عيب صغير فيه .. و نسيت إن كلنا بشر مليانين عيوب .. غروري خلاني أشوف نفسي كاملة و الناس حواليا ميستحقونيش .. لحد ما الزمن عدي بسرعه و عنست .. و بقيت لوحدي .. حتي جمالي راح

١٣-
يرجع بيا الزمن !! يابني انا فاكر إني إمبارح كنت قدك .. معرفش ازاي بقا عند ٦٤ سنة بسرعة كدا .. الأيام عدت بسرعة أوي مع إني كنت بتمني ده .. كنت بتمني إن اليوم يخلص بسرعة .. بس نسيت إن الأيام دي عمري .. و طلع عمري هو اللي بيجري قدامي بسرعه و ملحقتش أعمل حاجة .. انا صغير متكبرنيش

- ممكن الحكايات دي تبان قدامك إنها سطحية ، لكن الحقيقة إن ورا كل حكاية من دول قصص كبيرة و طويلة ، قصص بناءاً عن عُمر و سنين طويلة إتعاشت ، كل واحد بيحكي من وجهة نظره و المعطيات اللي موجودة في حياته .. بس أعتقد إن الحكايات دي دافع لنا عشان منندمش بعد كدا

- بالنسبة للجواز يا جماعة فكل الأسباب اللي في الـ Thread مقنعه ، لكن زي ما قولت دي بتختلف من شخص للتاني علي حسب المعطيات اللي في حياته .. شوف إيه اللي ناقصك من ده و إعمله

Behind every story of those.. Years and years of experience , pain , pressures, memories ..

- متنساش تعمل لايك لـ بيدج الفيسبوك : http://facebook.com/bluurr11/ 
- لو عندك أي Feedback إبعته هنا : http://curiouscat.me/Bluurr11 

- - - -
تقييمك للـ Thread ؟

.

..

-

-