Boys demma heartbreak be nasty pass. E be serious unpopular opinion more people no know of. Your boy pahnn on a normal day he be very jovial go start dey listen Adele, he no want eat, he no want boff, he start dey biz foolish foolish questions.

Rydee we dey play fifa we make set dey come pick teams, your man just make quiet for there.

“Ah Kofi we team you go use?”

“Charle just give me any thing charle, anything”

Tsw.

The worst part be if them sahn block am for Snapchat then things. So for a period he no go think about the girl then one day somebody go open the girl ein snap for ein body. She dey inside dey grind some other guy.
Rydee your man want shed and things.

“Herh Kofi rydee your girl tear o Herh”

More tears. But of course your man no go show. Hard guy. He go go room go shed. He no fi chop sake of ein moff all make bitter. You figure malaria lmao sagaa. Heartbreak.

Your man ein grades go down. Your man just make traumatized. If anything remotely dey Kai am of ein woman then he get some mini heart attacks. Your man no fi go some places he then ein then ein woman dey go. Last year them roam pent hall week, this Year he see fliers norr tears.

The most trying moment be if he for go some particular program he know pahnnn ein Ex go dey there. But your man no fi talk say he no go go otherwise boys go know say he dey try avoid ein ex. Rydee your man for so hard guy then go.

He go too ah as we all know, the girl go SHEDAAA come plus some new guy. Even worse she go come plus guy you make insecure of am as you two dey date. You go avoid am sahnn till you finally go meet.

“Oh hey Kofi hope you’re good”

“Oh yeah yeah I’m fine”

But you go see the way the guy dey hold your ex and things. She too she go shedaa make you know say he dey hold am better. No be small “baby can you go get the ice cream” she go talk for there. Rydee you for do like you no hear and things.

But your stomach all you want vomit.

The good thing be say sometimes you fi jieee eye sahn till ein birthday. That one de3 e be deadly. You go come twitter then ein pictures dey everywhere, snap,whatsapp, everywhere. Different boys dey wish am. Any of those boys dey eat by now.

Panic attack and things o Nana. Heartbreak dey fi make boys turn crifey. Ad3n ah “it’s my calling”. God no get your number saf you want claim the call by force. Rydee your boy pahnnn you Them am dey roll for twist, he dey church dey do “ITS NORRR BYY MIGHTTT, ITS NORR BY PARRRR”

Oh but sometimes heartbreak fi make somebody turn better guy. I know somebody them break in heart he take the anger All gym, sahn take the anger and pain all enter ein books. Your man make some hot intelligent guy rydee.