Read on Twitter
1. #رشيد واحدة من الأماكن الي كان نفسي أروحها وربنا رزقني بيها السنة الي فاتت. رشيد مدينة المليون نخلة ودي حاجة ما كنتش أعرفها قبل ما أروح. الحقيقة ان وانت رايح من الطريق الساحلي حاتشوف كميات النخل المهولة طول الطريق. ودا بيخلي صناعة التمور و الجريد من الصناعات المهمة لأهل رشيد
2. #رشيد هي ثاني أكبر مدينة اسلامية في مصر بعد القاهرة (من حيث العدد) وأغلب أثارها تعود للعصر العثماني. و ده سبب أن أغلب المباني الأثرية هناك رغم عددها لها نفس الشكل والطابع.
3.أغلب أثار #رشيد للأسف مهملة و حتلاقيها في وسط أسواق شعبية. وأغلبها مقفولة بس ممكن تزوروا هناك بيت الأمصيلي (سنة 1808 م) لأنه من القلة المفتوحة و في حالة جيدة.
4.طبعا لازم تزوروا برضه متحف #رشيد، رغم انه صغير ولكن مسلي. ومن البيوت المهمة بيت "الميزوني" و دا بيت أهل زبيدة (غادة رشيد) الي اتجوزها الجنرال مينو وقت الحملة الفرنسية.
و #رشيد عندها واحد من فرعين النيل عشان كده ما يفوتكش أنك تتفرج على نقطة إلتقاء النيل بالبحر
و #رشيد عندها واحد من فرعين النيل عشان كده ما يفوتكش أنك تتفرج على نقطة إلتقاء النيل بالبحر
5.من أهم الصناعات في #رشيد هي صناعة السفن. طول ما انت ماشي على الشط حتلاقي ورش بتصنع مراكب صيد و لانشات سياحية من كل الأحجام. معنديش رقم لعدد العاملين بالصناعة ولكن بالتأكيد مش عدد هين نظرا لعدد الورش. اللون الأزرق هو الطاغي لأغلب المراكب
6.و برضه عشان النيل حتلاقي صناعة الطوب موجودة في #رشيد، بس مش عارفة الصراحة هل الصناعة دي بدأت تقل و لا لا مع قلة الطمي. ولكن احساسي انها مش بنفس أهمية صناعة المراكب أو النخيل.
7.وطبعاً لازم نتكلم عن حجر #رشيد والموجود حالياً في المتحف البريطاني في انجلترا. الحجر تم اكتشافه في قلعة قايتباي في رشيد (أنشائها برضه السلطان قايتباي بتاع اسكندرية) أثناء الحملة الفرنسية. والحجر دا هو الي علمنا أزاي نقرأ اللغة المصرية القديمة بعد ما فك شامبيليون رموزه.
8.أشهر جامع في #رشيد هو جامع سيدي أبو النظر المعروف باسم أبو المندور. الناس بتروح تتبارك بيه و الساحة هناك يوم الجمعة و في الأعياد حتلاقيها مليانة ألعاب و بايعين و ممكن تركب حمار أو حصان :) و جرب تطلع التل و اتفرج على المكان من فوق.
9.غالبا مفيش حد من برة #رشيد بيروحها، و عشان كده حتلاقي الناس كلها بتبصلك باندهاش شديد وانت ماشي، والحقيقة زي أغلب مصر المعاكسات كتيرة (من السن الصغير نسبيا). وبالتالي برضه مفيش هناك غير عدد محدود جدا من الفنادق.
10.من الحاجات الحلوة في #رشيد هو الكورنيش الي الحكومة اهتمت بتطويره. الممشى كبير واواسع و القعدة هناك ترد الروح.
11.من الحاجات الملفتة في #رشيد هو عدم وجود مطعم! المنتشر أكثر هو وجود كافيتريا أو مطبخ بيعمل الأكل و أنت تاخد طلبك و تقعد في أي مكان تأكل ومن الحاجات المميزة كانت المركب ده الي حايخدك رحلة في النيل و انت جايب أكلك، و ممكن تطلب من عندهم مشاريب و شيشة و تدفع حاجة بسيطة ثمن الرحلة.
12.ولأن الي معايا حبوا يعملوا لي مفاجأة لعيد ميلادي واحنا في #رشيد، اكتشفوا ان مش سهل أبداً هناك تلاقي محل بيبيع تورتة :) أسهل تلاقي حلويات شرقية. و دا يوريك أد ايه البلد بسيطة وبعيدة عن روح الحضر.
13.التاكسي في #رشيد لونه أصفر في أخضر ، بس مش منتشر قوي غير في الشوارع الرئيسية و برضه ما شفتش أتوبيسات كتيرة و كحال أغلب الأماكن وسيلة المواصلات المنتشرة هي التوكتوك في الشوارع الضيقة و الميكروباص على الكورنيش. و ممكن من باب التسلية تاخد حنطور ياخدك لفة عل الكورنيش وقت العصرية.
